خوست ښار (پژواک، ۶ کب ۱۴۰۲): د خوست امنيتي مسوولين وايي، هغه دوه کسان یې نيولي چې څه موده وړاندې یې د نجونو د کورونو ترڅنګ هوايي ډزې کړې وې او له هغوی سره یې د کوژدن کېدو ادعا کوله.
د خوست د امنيه قوماندانۍ وياند طاهر احرار پژواک خبري اژانس ته وويل، هغه کسان يې نیولي چې د نجونو او د هغوی د کورنۍ له رضایت پرته یې د هغوی د کورونو ترڅنګ هوايي ډزې کړې وې او بیا یې ادعا کوله چې نجلۍ یې په نوم شوې ده.
نوموړي وویل، یاد کسان یې د اسلامي امارت د مشرتابه د ۳۹۵ ګڼې فرمان په اساس نيولي چې د ښځو د جبري نکاح کولو د مخنيوي په تړاو صادر شوی و.
هغه د موضوع د حساسیت له امله د نیول شوو کسانو شهرت شریک نه کړ، خو زیاته یې کړه چې هیڅ کله به دغه ولایت کې چاته د ناقانونه کړنو اجازه ورنه کړي.
د يادونې ده چې خوست کې څه موده وړاندې هم يو تن د ورته کړنې په تور نيول شوی و.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن