«روان کال ګردېز ښار کې ۳۸ پروژې پلې کېږي»

ګردېز (پژواک، ۹ غبرګولی ۱۴۰۳): د پکتیا د مرکز ګردېز ښاروال وايي چې روان کال د ښار پراختيا، داخلي سړکونو جوړولو، ښاري ښکلا او ښاريانو ته د نورو اسانتياوو برابرولو برخو کې ۳۸ پروژې پلې کېږي.

دغه څرګندونې د ګردیز ښاروال مولوي حبیب‌الرحمن منصور نن د یوې غونډې پرمهال وکړې.

هغه وویل چې د یادو ۳۸ پروژو له ډلې ۱۰ یې د ښاورالۍ له بودجې او پاتې ۲۸ نورې د یونپس موسسې لخوا پلې کیږي.

د منصور د معلوماتو له مخې، د ښاورالۍ پر اړوند پروژو ۲۰۰ میلیونه افغانۍ لګول کېږي او د یونپس لخوا پر هرې پروژې تر ۱۲۰ زرو امریکايي ډالرو پورې لګښت راځي.

د هغه په وينا، په يادو پروژو کې د ښار داخلي سړکونه، کوڅې، کانالونه، ويالې، ښاري ښکلا او ځينې نورې پروژې شاملې دي.

هغه له ښاريانو غوښتنه وکړه چې د خپلو کورونو، دوکانو او مارکېټونو د صفايۍ، ښاري خدمتونو او جوازونو پيسې دې پر وخت ښاروالۍ ته تحويل کړي.

بل لور ته خلک وايي چې ښاروالي باید دوی ته د پام وړ خدمات وړاندې کړي.

په دې اړه د ګردېز ښار د يوولسم ګذر وکيل ظاهر پژواک ته وويل چې لا هم د ‌ګردېز ښار څنډو کې ډېری سړکونه او کوڅې خامه دي.

هغه له حکومتي مشرانو غوښتنه وکړه چې ګردېز ښار داخل کې د ځينو لويو پروژو په پلي کولو دې له ګردېز ښاروالۍ سره مرسته وکړي.

د ګردېز ښار يوه بل اوسېدونکي سلطان پژواک ته وويل چې د ښاري ماسټر پلان نه تطبيق، غير معياري پلې لارې او د کانالېزاسیون نشتون خلک له ګڼو ستونزو سره مخ کړي دي.

ده ټینګار وکړ چې ښاروالي باید خلکو ته د پام وړ خدمات وړاندې کړي.

د معلوماتو له مخې، تېر کال ګردېز ښاروالۍ ته د ۱۷۰ ميليونه عوايدو ټولولو هدف ورکړل شوی و چې يوازې ۷۷ ميلیونه يې راټول کړي وو خو روان کال بيا ۲۳۷ ميليونه افغانیو عوايدو ټولولو هدف ورکړل شوی دی.