لوګر کې زرګونو څارویو ته د لمپي‌سکېن واکسین پيل شو

<p style="text-align: justify;">پل‌علم (پژواک، ۲۹ وږی ۱۴۰۳): د لوګر کرنې ریاست وایي چې د دغه ولایت په مرکز پل‌علم او ولسوالیو کې زرګونو لویو او وړو څارویو ته د پوستکي ناروغۍ «لمپي‌سکېن» واکسین پیل شو.</p>

<p style="text-align: justify;">د لوګر کرنې، اوبو لګولو او مالدارۍ ریاست مطبوعاتي مسؤل عبدالبصیر شاهد پژواک خبري اژانس ته وویل، دا واکسین د کرنې او مالدارۍ وزارت له لوري د ملګرو ملتونو د کرنې او خوړو نړۍوال سازمان (FAO) په مالي ملاتړ په مرکز پل‌علم او ولسوالیو کې شاوخوا ۵ زره او پنځه سوه لویو او وړو څارویو ته تطبیقېږي.</p>

<p style="text-align: justify;">شاهد زیاته کړه، یاد واکسین تطبیق چې نن عملا پيل شو تر راتلونکې یوې میاشتې پورې به دوام وکړي.</p>

<p style="text-align: justify;">نوموړي زیاته کړه، که څه هم د تېر کال په پرتله دلته د غواګانو د پوستکي ناروغي «لمپي‌سکېن» کمه شوې خو بیا هم په ځینو غواګانو کې د دې ناروغۍ نښې نښانې لیدل شوې دي.</p>

<p style="text-align: justify;">دغه راز، د لوګر کرنې او مالدارۍ ریاست د مالدارۍ امر ډاکټر خانشیرین خسرو پژواک ته وويل، د دغه واکسین له عملي کېدو څخه موخه د بې‌وزله مالدارو لاسنیوی او د غواګانو د پوستکي ناروغۍ پر وړاندې مبارزه کول دي.</p>

<p style="text-align: justify;">خسرو له مالدارو وغوښتل چې د کرنې او مالدارۍ ریاست له روغتیايي ډلو سره په خپلو سیمو کې مرسته وکړي، څو ټول څاروي واکسین شي.</p>

<p style="text-align: justify;">همدرانګه د مرکز پل‌علم یوه مالدار شفیق‌الله پژواک ته وویل، لاهم په دغه ولایت کې په څاریو کې لمپي‌سکېن ناروغۍ لیدل کېږي.</p>

<p style="text-align: justify;">هغه ټینګار وکړ چې په دغه ولایت کې باید ټولو څارویو ته د ناروغیو واکسینونه تطبیق شي.</p>

<p style="text-align: justify;">د یادونې ده، تېر کال هم په لوګر کې زرګونو څارویو ته لمپي‌سکېن ناروغۍ واکسین تطبیق شوی و.</p>