د هېواد د اقتصادي وضعیت په اړه د مالیې وزارت ارزونه

کابل (پژواک، ۱۰ سلواغې ۱۴۰۳): د مالیې وزارت وایي، د افغانستان بانکي سکټور باثباته دی او د ډالرو پروړاندې د افغانۍ ارزښت څه ناڅه را کمېدو عوامل کورني او بهرني منفي تبلیغات دي چې دا چاره د هېواد د بد اقتصادي وضعیت ښکارندويي نه کوي.

د مالیې وزارت په خبرپاڼه کې راغلي چې د هېواد د اقتصادي وضعیت د ارزوني غونډه، د دغه وزارت د سرپرست ملا محمدناصر اخوند په مشرۍ ترسره شوه چې په کې د ملي سوداګرۍ، بهرنیو بشري مرستو، پولي واحد (افغانۍ) د ارزښت او پر ملي اقتصاد د بهرنیو سیاسي بدلونونو او ناسمو رسنیزو تبلیغاتو اغېز په اړه هر اړخیز او تخصصي بحثونه وشول.

یاد وزارت لیکلي چې د افغانستان د موجوده اقتصادي وضعیت هر اړخیزه ارزونه یې کړې چې له مخې یې د هېواد اقتصادي وضعیت عادي ښودل شوی دی.

خبرپاڼه کې راغلي، په دغه غونډه کي څرګنده شوه چي د هیواد د سوداګرۍ (وارداتو او صادراتو) بهیر له کومي ستونزي پرته په ښه حالت کي دی، بانکي سيکټور باثباته دی، ملي عواید په شفاف ډول راټولېږي او د نظام اړین لګښتونه په عادي ډول له ستونزي پرته تادیه کېږي.

یاد وزارت لیکلي: «دا چي له تېرو څو ورځو راهیسي د هېواد د پولي واحد ارزښت د بهرنیو اسعارو په ځانګړي ډول د ډالر پر وړاندي څه نا څه ټکنی شوی دی، عوامل یې په لویه کچه کورني او بهرني منفي تبلیغات ګڼل کېږي، چي د افغانۍ ترڅنګ یې د سیمي او نړۍ د یو شمېر نورو هېوادونو د پولي واحدونو پر ارزښت هم منفي اغېزه کړې ده او دا چاري د هېواد د منفي اقتصادي وضعیت ښکارندویي نه کوي.»

خبرپاڼه زیاتوي، په ټوله کي د افغانۍ د ارزښت ساتلو په برخه کي کورني اقتصادي عوامل په عادي حالت کي قرار لري او یاد عوامل د پولي واحد د تلپاتي ارزښت ساتلو هڅو ته دوام ورکوي.

مالیې وزارت لیکلي چې دغه وزارت به له اړوندو امارتي ادارو سره په ګډه په راتلونکي کي هم د ملي اقتصاد او پولي واحد د باثباته ساتلو په برخه کي خپل مکلفیتونه په جدي ډول ترسره کوي څو له بهرنیو عواملو پرته په خپلواک ډول د هېواد اقتصادي وضعیت پیاوړی پاتي وي.