کابل (پژواک، ٧ ميزان ٩٩) : داکتر عبدالله عبدالله رئیس شورای عالی مصالحهٔ ملی، صبح امروزبه دعوت رسمی عمران خان صدراعظم پاکستان در رأس یک هیأت بلند پایهٔ حکومت عازم اسلام‌آباد شد.
در يک خبرنامه که از طرف شوراى عالى مصالحه ملى منتشر شده آمده است، در این سفر، رییس شورای عالی مصالحهٔ ملی در پیوند به تلاش‌های صلح پایدار، با عزت و عادلانه در افغانستان با رهبران ارشد جمهوری اسلامی پاکستان بحث و تبادل نظر می‌کند.
منبع افزوده است، داکتر عبدالله عبدالله، رییس شورای عالی مصالحهٔ ملی در جریان اقامت خود با داکتر عارف علوی رییس‌جمهور، عمران‌خان صدراعظم، اسد قیصر رییس مجلس نمایندگان، محمد صادق سنجرانی رییس مجلس سنا، شاه‌محمود قریشی وزیر امورخارجه، جنرال قمر جاوید باجوه رییس ستاد ارتش و سایر مقامات این کشور ملاقات می‌کند.
در خبرنامه آمده است، رییس شورای عالی مصالحهٔ ملی را در سفر به جمهوری اسلامی پاکستان معاونان شورای عالی مصالحهٔ ملی، مشاوران و تعدادی از شخصیت‌های سیاسی کشور همراهی می‌کنند.
منبع افزوده است، این نخستین سفر دکتور عبدالله عبدالله در یک دهۀ اخیر به جمهوری اسلامی پاکستان می‌باشد.
رئیس شورای عالی مصالحهٔ ملی قبل از سفر به اسلام گفت: «در سفر به اسلام آباد با رهبران و مقامات عالی رتبهٔ جمهوری اسلامی پاکستان در بارهٔ تلاش‌های صلح صحبت می‌کنیم. امیدواریم با سفر به اسلام آباد فصل تازه‌ای از همکاری‌های مشترک میان دو کشور در عرصه‌های مختلف به ویژه برقراری صلح پایدار و با عزت باز گردد.»
Visits: 1
تماس با ما
خبرنامه
ارسال گزارش
اپلیکیشن موبایل پژواک