پل علم (پژواک ٥ ليندۍ ٩٠): په پل علم ښار کې د ماين چاودنې له امله د خصوصي امنيتي کمپنۍ درې کارکوونکي ووژل شول.
د لوګر د والي وياند دين محمد دروېش نن (د ليندۍ ٥مه) پژواک خبري اژانس ته وويل، چې تېر ماښام د يوې امنيتي خصوصي کمپنۍ سرف موټر د پل علم د ټنډانو په سيمه کې پر يوه ريموټ کنټرول ماين وربرابر شو.
د هغه په وينا، په دې چاودنه کې درې تنه وژل شوي او ملکي کسانو ته مرګ ژوبله نه ده اوښتې.
دروېش زياته کړه، چې دا ماين د مخالفينو له لوري په سيمه کې ځاى پرځاى شوى وو.
د لوګر د امنيه قوماندانۍ د امنيت امر سمونوال محمد جان عابد، پژواک سره په مرکه کې د ماين چاودنه تاييد کړه؛ خو د مرګ ژوبلې په اړه يې معلومات ورنه کړل.
د ټنډان د سيمې يوه اوسېدونکي نعمت الله پژواک ته وويل: ((په کور کې وم چې د يوې زورورې چاودنې غږ مې واورېده او کله چې ووتم، يو سرف موټر د سوځېدو په حال کې و.))
د هغه په وينا، پوليسو درې مړي له موټر څخه راووېستل او له ځان سره يې يوړل.
د دې پېښې مسووليت تراوسه چا پر غاړه نه دى اخيستى.
د يوه بل خبر له مخې، د لوګر ولايت په بره کي برک ولسوالۍ کې له افغان او ايساف ځواکونو سره د وسله والو طالبانو د نښتې په ترڅ کې څلور وسله وال طالبان ووژل شول او يو شمېر نور ټپيان شول.
د لوګر د والي وياند دين محمد دروېش پژواک ته وويل، چې دا نښته تېر ماښام هغه مهال رامنځ ته شوه، چې وسله والو طالبانو د ابراهيم خېلو په سيمه کې پر امنيتي پوستې بريد وکړ.
د هغه په وينا، په دې نښته کې څلور وسله وال طالبان ووژل شول او يو شمېر نور ټپيان شول؛ هغه د ټپيانو د شمېرې په اړه کره معلومات وړاندې نه کړل.
د سيمې يوه اوسېدونکي جمشېد پژواک ته وويل: ((شاوخوا نيم ساعت د ډزو اوازونه اورېدل کېدل.))
هغه څرګنده کړه، چې سيمه د امنيتي ځواکونو له لوري تر کنټرول لاندې ده او چا ته د نږدې کېدو اجازه نه ورکول کېږي.
وسله والو طالبانو تراوسه په دې اړه څه نه دي ويلي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن