مزارشريف (پژواک ١٦کب ۹۰):په شمال کې د ۵ نمبر سرحدي پوليسو قوماندانۍ قوماندان جنرال عبدالحبيب سيدخېل د کب په ۱۷مه، وويل چې په ځواکونو کې يې ښځينه پوليسو ته ډېره اړتيا لري.
نوموړي دغه څرګندونې د دغې قوماندانۍ د ښځينه پوليسو له خوا د مارچ په اتمه، د ښځو د نړيوالې ورځې په وياړ جوړو شويو مراسمو کې وکړې.
نوموړي زياته کړه: ((په بندرونو کې چې ډېری ښځې هم تګ راتګ کوي، په تلاشي ځايونو کې د ښځينه پوليسو اړتيا ډېره ليدل کېږي.))
د هغه په وينا، څرنګه چې پوليس د ملي اردو په پرتله له خلکو سره ډېر ښکېل دي؛ نو ښايي د پوليسو په کتار کې د نارينه وو ترڅنګ ښځينه په کافي اندازه موجودې وي.
سيدخېل وويل، چې په قوماندانۍ کې ۶ ښځينه افسرې، ۱۲ ساتمنې او ۲۳ نورې ټيټ رتبه پوليسې دندې ترسره کوي.
د هغه په وينا، يو شمېر پوليسې يې په شېرخان بندر، د کندوز هوايي ډګر، د مزارشريف هوايي ډګر او حيرتان ښارګوټي کې پر دندو بوختې دي.
نوموړي پر مېرمنو غږ وکړ، چې د هېواد د ساتنې په موخه دې له دوی سره يوځای شي او له مساوي حقونو برخمنې شي.
په ياده قوماندانۍ کې ښځينه پوليسې د خپلو امرانو له چلند څخه خوښې برېښي او وايي، چې په مناسبو پوستونو يې ګومارلې دي.
شکيلا چې په ۱۳۸۸ لمريز کال د کوماندو له اکاډمۍ څخه فارغه شوې ده او اوس د ۵ نمبر سرحدي پوليسو په قوماندانۍ د عامه چارو د مرستيالې په توګه دنده ترسره کوي، پژواک وويل: ((زه له خپل قوماندان څخه خوښه يم، چې مونږ ته يې موقع راکړه، ترڅو د ښځو نړيواله ورځ ونمانځو.))
نوموړې زياته کړه، چې په ډېريو عملياتو کې يې برخه اخيستې او د خپلو امرانو له چلند څخه خوښه ده.
دا په داسې حال کې ده، چې څه وخت وړاندې په شمال کې د پامير ۳۰۳ زون قوماندانۍ د جندر او بشري حقونو مسوولې سمونمل نجيبه نجيب ويلي و، چې په شمال کې له ښځينه پوليسو سره دوه ګونی چلند کېږي.
د هغې په وينا، د همدې امرانو او نارينه پوليسو ناسم چلند د دې لامل شوی، چې د پوليسو ليکو ته ښځينه پوليسې لږ زړه ښه کوي.
Views: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن