کندهار ښار (پژواک ٢٩ ورى ٩١): د کندهار ولايت په پنجوايي ولسوالۍ کې د کوکنارو کمپاين دوام لري او تر دې مهاله ١٧٥ جريبه ځمکه له کوکنارو پاکه شوې ده.
د کوکنارو اړولو کمپاين، چې په دې ولسوالۍ کې له تېرو اتو ورځو را په دې خوا پيل شوى، د سپېروان تر سيمې رسېدلى دى.
د پنجوايي ولسوال حاجي فضل محمد اسحاقزي پژواک خبري اژانس ته وويل، چې په دې موده کې د دغې ولسوالۍ په بېلابېلو سيمو کې ١٧٥ جريبه ځمکه له کوکناور پاکه شوې ده.
هغه زياته کړه، د کوکنارو د اړولو په کمپاين کې ورسره سيمه ييز قومي مشران همکاري کوي او دغه لړۍ دوام لري.
د پنجوايي امنيه قوماندان سردارمحمد نظري وايي، چې په دې ولسوالۍ کې د پخوا په پرتله امنيت ټينګ شوى او امنيتي ځواکونه د کوکنارو د اړولو پر مهال له کوم امنيتي خنډ سره نه دي مخ شوي.
دى وايي، پوليس ژمن دي چې د دې ولسوالۍ په ټولو سيمو کې کوکنار له منځه يوسي.
دا په داسې حال کې ده، چې پنجوايي ته ورڅېرمه په ژېړۍ ولسوالۍ کې تېره ورځ د کوکنارو د کښتونو د له منځه وړلو پر مهال د پوليسو او وسلوالو تر منځ په وسلواله نښته کې ٧ مخالفينو ته مرګ ژوبله اوښتې ده.
په کندهار کې له نږدې يوې مياشتې راهيسې د کوکنارو اړولو کمپاين پيل شوى او چارواکي وايي، چې سږ کال به دغه لړۍ د تېر په پرتله ښه تر سره شي؛ ځکه اوسمهال امنيتي ځواکونه د کندهار پر ټولو ولسواليو حاکم دي.
څو اونۍ وړاندې د نشه يي توکو پر وړاندې د مبارزې وزير ضرار احمد مقبل، کندهار ته د خپل سفر پر مهال ويلي و، چې سږ کال په کندهار کې د کرل شويو کوکنارو کچه کمه ده او هغوى به د کرل شويو کوکنارو د له منځه وړلو په برخه کې جدي کار کوي.
Views: 5
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن