کابل (پژواک ٣١ ورى ٩١): د پاکستان ولسمشر اصف علي زرداري په کابل او يو شمېر نورو ولايتونو کې د تېرې يکشنبې ورځې د بريدونو په اړه ولسمشر کرزي ته خپله خواشيني څرګنده کړه.
د تېرې يکشنې په ورځ وسلوالو طالبانو د کابل ښار په درېيو برخو، د لوګر، ننګرهار او پکتيا په مرکزونو کې ډله ييز ځانمرګي او وسلوال بريدونه پيل کړل، چې په ځينو ځايونو کې يې تر ١٨ ساعتونو پورې دوام درلود.
بريد کوونکو د مهمو بهرنيو او دولتي ادارو ودانۍ د سپکو او درنو وسلو تر بريدونو لاندې راوستلې وې.
د ولسمشرۍ ماڼۍ په وينا، د يکشنبې ورځې په ډله ييزو بريدونو کې ٣٦ بريد کوونکي، ١١ دولتي سرتېري او ٤ عام وګړي ووژل شول، ٤٠ امنيتي کسان او ٢٥ عام وګړي ټپيان وو.
د ولسمشرۍ ماڼۍ له مطبوعاتي دفتر څخه پژواک اژانس ته په رالېږل شوې خبرپاڼه کې ويل شوي، چې اصف علي زرداري تېر ماښام د ټيلېفون پر کرښه ولسمشر کرزي ته د يادې پېښې له امله خواشينې څرګنده کړه.
د سرچينې په وينا، د پاکستان ولسمشر دغه تروريستې پېښې وبللې او کلکې يې وغندلې او زياته يې کړه، چې په دغې غمېزه کې دى او د پاکستان ملت ورسره شريک دى.
په خبرپاڼه کې راغلي، چې ولسمشر کرزي له زرداري مننه وکړه او ترهګري يې د دواړه هېوادونو لپاره ګډ ګواښ وبلله.
سرچينه وايي، چې ولسمشر کرزي د ترهګرۍ پر وړاندې د دواړو هېوادونو پر ګډه مبارزه ټينګار وکړ او ويې ويل، چې له دې څخه د دواړو غاړو عام خلک تر ګواښ لاندې دي.
دا په داسې حال کې ده، چې د امريکا د دفاع وزير ليون پنيټا ويلي وو، چې د دوى د استخباراتي راپور له مخې، د کابل په ګډون د نورو ځينو ولايتونو په وسلوالو بريدونو کې د حقاني شبکې لاس و.
نوموړي اندېښنه وښوده، چې د حقاني شبکه په پاکستان کې په امن کې ده او دغه حالت د دوى لپاره د اندېښنې وړ دى، څو ځلې يې پاکستاني چارواکو ته ويلي، چې دوى ته دغه حالت نور د زغملو نه دى.
دغه راز د کورنيو چارو وزير بسم الله خان محمدي په يوه خبري غونډه کې ويلي وو، چې بريدکوونکي له پولې هغه خوا څخه راغلي وو او د وېرې خپرولو په موخه يې بريدونه تر سره کړل.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن