کابل (پژواک ١٦ غبرګولى ٩١): د ميدان وردګو ولايت مسوولين وايي چې د ايساف په هوايي بريد کې درې عرب وسلوال وژل شوي دي.
د دغه ولايت د والي وياند شاهد الله شاهد د غبرګولي په ١٦مه پژواک خبري اژانس ته وويل، چې دغه هوايي بريد تېره شپه د سيداباد ولسوالۍد ډنډوکي په کلي کې ترسره شوى دى.
هغه زياته کړه،چې په دغه هوايي بريد کې درې عرب وسلوال وژل شوي او د هغوى وسلې او مهمات هم له منځه وړل شوي دي.
د سيداباد ولسوال ډاکتر فضل کريم مسلم هم دغه پېښه تاييدوي او وايي چې دغه وسلوال عرب د سيمې له وسلوالو مخالفينو سره يو ځای څه موده مخکې سيمې ته داخل شوي وو.
شاهد وايي،د کشفي او اوپراتيفي معلوماتو پر بنسټ، تېره شپه ۲ بجې ياد عرب وسلوال د نوموړې ولسوالۍ د ډنډوکي په کلي د ايساف ځواکونو په هوايي بريد کې ووژل شول او مړي يې په سيمه کې پاتې دي.
وسلوالو طالبانو تر اوسه د دې پېښې په اړه څه نه دي ويلي.
خو طالب وياند ذبيح الله مجاهد بيا وايي، چې په سيداباد ولسوالۍ کې يې په يوه چاودنه کې درې پوليس وژلي دي.
Views: 3
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن