لښكرګاه (پژواك ۲۳ غبرګولى ۹۱ ) چارواکي وايي، چې د هلمند په سنګين ولسوالۍ کې د يو لړ عملياتو پر مهال ٢٠ وسلوال طالبان وژل شوي دي.
د سنګين ولسوال شريف الله خان د غبرګولي په ۲۳ مه پژواك خبري اژانس ته وويل، چې پرون ټوله ورځ د ولسوالۍ په پوستانزو سيمه كې د سيمه ييزو پوليسو او وسلوالو طالبانو ترمنځ نښته روانه وه.
هغه زياته کړه ، چې ددې جګړې په ترڅ کې ددولت ٢٠ وسلوال مخالفين ووژل شول، څلور تنه يې ټپيان شوي،چې په ټپيانو کې د ملاياسين په نامه ددوى يو مهم قوماندان هم شامل دى.
دى وايي ،چې د جګړې پر مهال ملي پوليس ، د ملي اردو سرتېري او د ايساف ځواکونه هم د سيمه ييزو پوليسو مرستې ته ورسېدل او ايساف پر مخالفينو هوايي بريد هم کړى دى.
ولسوال وويل، چې په دې جګړه كې دوه سيمه ييزه پوليس هم وژل شوي او شپږ نور يې ټپيان دي ،چې ټپيان نږدې روغتيايي مركزونو ته رسول شوي دي.
شريف الله خان زياتوي ، چې ياده سيمه له موسى كلا ولسوالۍ سره په نږدې واټن كې موقعيت لري او د سنګين له مركز څخه ۲۵ كيلومتره لرې شمال لور پرته ده، چې له همدي امله وسلوالو طالبانو خپل مړي او ټپيان موسى كلا ولسوالۍ ته لېږدولي دي.
د سنګين ولسوال زياته كړه ،چې دطالبانو لخوا يو لوى پلان په لاره اچول شوى ، تر څو ياده سيمه په خپل واك كې راولي، خو دا چې امنيتي ځواكونه له مخکې چمتو وو، طالبان له ماتې سره مخامخ شوه.
وسلوالو طالبانو ددې نښتې په اړه څه نه دي ويلي، خو ددوى يو وياند قاري يوسف احمدي وايي ،چې په تېرو لسو ورځو کې يې په سنګين او کجکي ولسواليو کې لسګونه کورني او بهرني سرتېري وژلي دي.
Views: 17
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن