واشنګټن (پژواک ٧ وږى ٩١): په افغانستان کې د قران کريم د نسخو سوځونې او د وژلو شويو طالبانو مړو ته د سپکاوي پر جرم نهه امريکايي سرتېرو ته ډسپليني سزا ورکړل شوه.
تېر کال د کب مياشتې په لومړيو کې امريکايي ځواکونو په بګرام زندان کې د قران کريم يو شمېر نسخې وسوځولې چې له دې پېښې وروسته د عامو افغانانو له خوا له تاوتريخوالي ډک لاريونونه ترسره شول.
په دغو لاريونونو کې تر ٣٠ زيات افغانان ووژل شول، لسګونه ټپيان شول، دغه راز د دغو پېښو په غبرګون د افغانانو او ملي ځواکونو پر امريکايي سرتېرو بريدونه هم پيل شول چې له امله يې يو شمېر امريکايي سرتېري هم ووژل شول.
د امريکا ولسمشر بارک اوباما او په افغانستان کې د امريکايي ځواکونو لوى قوماندان جنرال جان الن پر دې پېښې له افغانانو بښنه وغوښته.
که څه هم د افغانستان حکومت، ملي شورا، د علماوو شورا او عامو افغانانو د دې پېښې عاملينو ته د سختې سزا غوښتنه کوله، خو د امريکا يوې محکمې د قران کريم د نسخو سوځونې په تور شپږو امريکايي سرتېرو ته ډسپليني سزا ورکړې ده.
د امريکايي ځواکونو د مرکزي قوماندانۍ له خوا پرون د يادې پېښې تر څېړلو وروسته څېړنيز راپور خپور شوى دى.
سرچينې زياته کړې، چې دا څېړنه د يوه لوړ پوړي امريکايي پوځي چارواکي له خوا ترسره شوې او په کې راغلي چې سرتېرو يې په قصدي توګه د مسلمانانو د سپيـځلي کتاب (قران کريم) د سپکاوي هڅه نه وه کړې.
ويل کېږي چې امريکايي سرتېرو د قران کريم او نورو ديني کتابونو شاوخوا ١٠٠ نسخې له دې امله سوځولې وې، چې په بګرام کې بنديانو ترې د سخت دريځۍ لپاره ګټه پورته کوله.
د امريکايي پلاوي په څېړنيز راپور کې راغلي، چې دغو سرتېرو د اسلام او د دغه دين د سپېڅلي کتاب قصدي سپکاوى نه دى کړى.
دغه راز ياد امريکايي څېړنيز کمېسيون درېيو نورو سرتېرو ته د وسلوالو طالبانو پر مړو د متيازو کولو او د هغوى د جسدونو د سپکاوي په تور هم ډسپليني سزا ورکړې ده.
دغه ويډيو تېر کال د مرغومي په مياشت کې خپره شوې وه، چې تر دې وروسته امريکايي ځواکونه تر سختو نيوکو لاندې راغلل.
که څه هم په ياد راپور کې امريکايي سرتېرو ته د سزا د څرنګوالي په اړه معلومات نه دي ورکړل شوي، خو ويل کېږي، چې د امريکا د قانون له مخې په ډسپليني سزا کې د سرتېرو معاش ګرځول کېږي، ټيټې دندې ورکول کېږي او يا هم زياته پيره پرې کول کېږي.
Views: 8
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن