کابل (پژواک ٧ غويى ٩٢): د ولسي جرګې يو شمېر غړي وايي، د دې جرګې د پرېکړې خلاف د جرګې يو شمېر غړي د کورنيو چارو وزارت ته له غوښتنليکونو سره يو ځاى ورغلي وو.
د ولسي جرګې غړو د غويي په ٤مه پرېکړه وکړه، چې د اعتراض په ډول به د يوې مياشتې لپاره کورنيو چارو وزارت ته نه ورځي او د کورنيو چارو وزير بايد د دوشنبې په ورځ جرګې ته د استجواب لپاره حاضر شي.
ولسي جرګې دغه پرېکړه وروسته له هغه وکړه، چې د کورنيو چارو وزير غلام مجتبى پتنګ درې ورځې وړاندې د ملي امنيت شورا په ناسته کې د ملي شورا د ځينو غړو د بې ځايه غوښتنو په اړه اندېښنه څرګنده کړه او ويلي يې وو، چې د تېر کال د مرغومي مياشتې له پيله تر اوسه ٣٢ ځلې ولسي جرګې او ١٤ ځلې مشرانو جرګې ته ورغوښتل شوى دى.
همدارنګه د کورنيو چارو وزير ويلي وو، چې په تېرو څلورو مياشتو کې يې د ملي شورا د غړو ١٥٢٠٠ غوښتنليکونه ترلاسه کړي چې په دې کې ځينې ناقانونه غوښتنې دي.
د ولسي جرګې په نننۍ غونډه کې د پکتيکا استازي نادرخان کټوازي وويل، چې د جرګې د پرېکړې خلاف د تېرې چهارشنبې په ورځ د ولسي جرګې يو شمېر غړي د کورنيو چارو وزارت ته له غوښتنليکونو سره يو ځاى ورغلي وو.
ده زياته کړه: ((ما ته خبر ورسېد، چې ٢٥٠ عريضي بيا د ولسي جرګې غړو د کورنيو چارو وزارت ته ور وړې دي.))
کټوازي د جرګې له اداري پلاوي غوښتنه وکړه، چې د جرګې د ځينو غړو له خوا د جرګې د پرېکړو د ماتېدو مخه ونيسي.
په ياده جرګه کې د کونړ استازي محمدصالح صالح پژواک خبري اژانس ته وويل، چې د چهارشنبې په ورځ دى هم د کورنيو چارو وزارت ته ورغلى و.
هغه زياته کړه، چې د کورنيو چارو وزارت ته يې عريضه نه وه وړې خو د يو بل شخصي کار لپاره ورغلى و.
صالح ټينګار کاوه، چې ده د جرګې له پرېکړې مخالفت نه دى کړى ځکه چې له غوښتنليک پرته دغه وزارت ته تللى دى.
خو هغه وويل، چې ده په دې ورځ د ولسي جرګې ګڼ شمېر نور غړي په کورنيو چارو وزارت کې وليدل، چې له غوښتنليکونه سره يو ځاى دغه وزارت ته ورغلي وو.
د ولسي جرګې دويم مرستيال محمد صالح سلجوقي، چې نننۍ غونډه يې تر مشرۍ لاندې جوړه شوې وه وويل، چې د جرګې غړي بايد د جرګې پرېکړو ته احترام ولري.
ده يو ځل بيا له وکيلانو وغوښتل، چې د ولسي جرګې له پرېکړې سره د کورنيو چارو وزارت ته د يوې مياشتې لپاره ورنه شي.
د کورنيو چارو وزارت وياند غلام صديقي صديقي وزارت ته د جرګې د غړو د ورتګ په اړه له څه ويلو ډډه وکړه.
Views: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن