هرات (پژواک ٨ تله ٩٢): چارواکي وايي، چې د هرات په اوبې ولسوالۍ کې د سيمه ييزو پوليسو پر يوه پوسته بريد کې د دريو ملکي وګړو په ګډون ٩ تنه وژل شوي دي.
د اوبې امنيه قوماندان سمونوال شېراغا الکوزي د تلې په ٨مه پژواک خبري اژانس ته وويل، چې دغه بريد تېره شپه د سرا پرده په کلي کې د سيمه ييزو پوليسو پر پوسته شوى دى.
نوموړى واىي، چې په دې پېښه کې څلور وسله وال بريد کوونکي او دوه سيمه ييز پوليس وژل شوي دي.
د قوماندان په وينا، چې وسله وال بريد کوونکي ټپيان شوي هم دي، خو کره شمېره يې نه وه ورته معلومه.
خو د اوبې ولسوالۍ يوه بله امنيتي سرچينه چې د نوم له اخيستو يې ډډه کوله پژواک ته وويل، چې په دې جګړه کې درې عام وګړي هم وژل شوي دي.
اوبه د هرات شمال ته په سل کليومترۍ کې پرته ولسولاۍ ده او په پرتليزه توګه په نا امنه سيمو کې راځي.
طالبانو د يادې پېښې په تړاو څه نه دي ويلي، خو وياند يې قاري يوسف احمدي پژواک ته ويلي، چې د هرات په اوبه کې يې پر امنيتي ګزمه بريد کړى، يو پوليس يې وژلى او دوه نور ټپيان شوي دي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن