ایبک(پژواک ١٠سلواغه ٩٣ ): د سمنګان ولايت د دره صوف پائين ولسوالۍ په يوه جومات کې چاودنې اووه تنه ټپيان کړل .
د دره صوف پائین ولسوال همایون برلاس پژواک اژانس ته وويل چې دغه پېښه نن د جمعې له لمانځه وروسته د دغې ولسوالۍ په مرکزي جومات کې رامنځته شوه .
هغه وويل چې چاودنه له لرې څخه د کنټرولېدونکي ماين له امله رامنځته شوې ده .
د نوموړي په وينا،چې په دې چاودنه کې شپږ عام وګړي او يو د ولسوالۍ د امنيه قوماندانۍ اداري مدير ټپيان شوي دي.
د برلاس په خبره ، چې ټپيان روغتون ته ليږدول شوي او روغتيايي حالت يې ښه ښودل شوى دى.
ده ، وسله وال طالبان د دا ډول پېښو عاملين وبلل، خو تراوسه وسله والو طالبانو ددې پېښې په اړه څه نه دي ويلي .
د دره صوف پائین يوه اوسېدونکي نعمت الله پژواک ته وويل چې د چاودنې پرمهال دى هم په جومات کې و .
ده وويل، له چاودنې وروسته يې يو شميرعام وګړي وليدل چې په ټپي حالت کې پراته وه .
نوموړي دا کار د اسلام او مسلمانو پرضد ناوړه او له نفرت څخه ډکه کړنه وبلله.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن