جلال اباد ښار کې د رېکشاوو زياتوالي خلک له روغتيايي ستونزو سره مخ کړي

جلال اباد (پژواک، ۲۸ سلواغه ٩٥): د ننګرهار امنيه قوماندان وايي چې دغه ولايت ته په غير قانوني ډول ۳۵ زره ريکشاوې راغلي چې د خلکو روغتيا يې له ګواښ سره مخ کړې ده.

د امنيه قوماندان مل پاسوال سيد ګل اقا روحاني د معلوماتو له مخې، جلال اباد ښار کې له ۳۵ زره عرادې ډېرې  رېکشاوې فعاليت کوي چې ډېرى يې قانوني اسناد نه لري او په ناقانونه لارو هېواد ته راوړل شوې دي.

هغه پژواک خبري اژانس ته وويل چې ددې رېکشاوو ډېرى چلوونکي د اسنادو نه لرلو ترڅنګ د ډريورۍ لاېسنس هم نه لري.

خو د ننګرهار امنيه قوماندان وايي، تازه يې هغو رېکشاوو ته چې په قانوني ډول هېواد ته راوړل شوې دي، د اسنادو او پلېټ د وېش لړۍ پيل کړې ده.

نوموړي د کوم هېواد نوم وانخيست، پخوا رېکشاوې له پاکستان څخه راوړل کېدې، خو په دې وروستيو کې له هند څخه هم راوړل شوې  دي او اوس ورته  قانوني اسناد ورکول کېږي.

امنيه قوماندان وايي، د نورو رېکشاوو لپاره چې قانوني نه وي او اسناد ونه لري، د چلوونکو لپاره يې د لاېسنس د ورکړې لړۍ پيلوي چې پرته له لايسنس به ورته د ريکشا چلولو اجازه نه ورکول کيږي.

روحاني زياته کړه: ((موږ ټولو چلوونکو او په ځانګړې توګه د رېکشاوو چلوونکو ته اعلاميه ورکړې چې بايد د روان کال تر پايه لاېسنس جوړ کړي چې تر څو په ښار کې د وسايطو د چلوولو پرمهال قانون په ځان تطبيق کړي.))

بلخوا د جلال اباد ښاريان، روغتيا پالان او کارپوهان وايي چې په جلال اباد ښار کې په دومره زيات شمېر د ريکشاوو موجوديت د دغه ښار د اوسېدونکو ژوند له ګواښ سره مخ کړی دی.

د چارواکو تازه معلومات څرګندوي چې اوسمهال په جلال اباد ښار او شاوخوا سيمو کې له درې ميليونو زيات وګړي ژوند کوي، چې هره ورځ يې له نيمايي زيات په ښار کې تګ راتګ کوي او مستقيماُ د همدغو ريکشاوو له لوګيو او شور سره مخ دي.

د ننګرهار د چاپيريال ساتنې ادارې رييس فضل الربي هميم له پژواک سره د خبرو پرمهال اندېښنه وښوده چې په جلال اباد ښار کې د زرګونه ريکشاوو شتوالي، د دغه ښار چاپيريال چټل کړی او د اوسېدو نا مناسبه فضا يې رامنځته کړې ده.

دی وايي،  د همدغې ستونزې د حل لپاره يې له رېکشاوو د ګاز ډبو لرې کولو کمپاين پيل کړی، چې تر اوسه يې له څوارلس سوه زياتې ګاز ډبې راټولې کړي او لا هم دغه لړۍ دوام لري.

د نوموړي په وينا، د ګاز ډبو راټولول د دغې ستونزې د حل لاره نه ده او تر هغه وخته چې د ريکشاوو بديل او ريکشا چلوونکو ته بديل کار پيدا نه شي؛ نو دغه ستونزه نه شي حل کېدای.

د جلال اباد ښار اوسېدونکي احمدالله پژواک اژنس ته وويل چې په ښار کې داسې ريکشاوې هم شته چې د لوګي اندازه يې له حده زياته او لوی مشکل په ريکشاوو کې د ګازو او مبلايلو استعمال دی.

نوموړي په ښار کې د ريکشاوو د شور په اړه هم اندېښنه وښوده چې په خبره يې ښاريان ترې د يو بل غږ هم نه شي اورېدلی دی.

په جلال اباد ښار کې يوه ريکشا چلوونکي نور الله  پژواک ته وويل چې ترافيک ډير کله له هغو رېکشاوو څخه ګاز ډبې کښته کوي  چې ريکشا يې لوګی کوي؛ خو اوس ريکشا چلوونکو دغه ګاز ډبې په پټو ځايونو کې ايښې دي.

دی وايي: ((د ريکشاوو کې د ګاز استعمال دومره لوګی نه کوي؛ خو موږ په کې مبلايل استعمالوو؛ ځکه بيا انجن خرابيږي؛ خو ځيني ريکشا چلوونکي بيا قصدي مبلايل زياتوي، چې لوګی هم ورسره ډيرېږي .))

ډاکټران وايي چې په ښار کې د ريکشاوو موجوديت د خلکو روغتيا ته زيان اړولی او د سږو له بېلابېلو ناروغيو سره سره يې خلکو ته رواني ناروغۍ هم پيدا کړې دي.

د داخله ناروغيو متخصص ډاکټر محمد شعيب ساپي پژواک اژانس ته وويل چې د ګازو د لوګي تنفس کول د سږو ناروغي پيدا کوي او د ريکشاوو تيز غږونه مستقيما د خلکو په فکر او عصبي سيستم تاثير کوي او رواني ناروغۍ ورته پيدا کوي.

کارپوهان په دې باور دي چې د جلال اباد ښار د مساحت کموالی، د نفوسو ډيروالی او د کار نشتوالی د دې لامل شوي چې په ښار کې د ريکشاوو شمېر  زيات شي او تر هغه وخته چې دغو درېيو ستونزو ته حل لاره ونه لټول شي، د ريکشاوو موجوديت نه شي کمېدلى.

Views: 2