کابل (پژواک، ٢٢ ورى ٩٦): د کابل ښار د پنځمې ناحيې د کمپنۍ بازار په مربوطاتو کې ناپېژاندو وسله والو د ملي دفاع وزارت يو افسر وژلی دی.
د ملي دفاع وزارت وياند تورن جنرال دولت وزيري وايي چې د دفاع وزارت د مادي او تخنيکي معاونيت د انجنيري رياست افسر ډګروال سلطان محمود نن سهار شپږ بجې د کابل ښار کمپنۍ سيمې د بازار په کاريز ساحه کې د ناپېژاندو اشخاصو له بريد سره مخ شو.
هغه زياته کړه چې د ملي اردو دغه افسر له کوره د دندې پر لور روان و چې بريد ورباندې وشو.
هغه وويل چې د پېښې د څرنګوالي او لاملونو په اړه يې څېړنې روانې دي.
د ١٠١ اسمايي زون قوماندانۍ چارواکو هم د پېښې پخلى کړى او په دې اړه يې د څېړنو خبر ورکړى دی.
دا په داسې حال کې ده چې پرون ورځ هم په کابل ښار کې د عدلي او قضايي مرکز دوه افسرانې او يو د مهمو اشخاصو د ساتنې رياست افسر د ناپېژاندو کسانو له لوري ووژل شول.
دا په داسې حال کې ده چې د مشرانو جرګې غړې ډاکتر انارکلي هنريار نن د جرګې په عمومي ناسته کې د کابل ښار امنيتي وضعيت د اندېښنې وړ وباله.
هغې وويل چې دا پېښې پلان شوې او بايد په اړه يې جدي څېړنې ترسره شي.
هنريار له کشفي او څارګرو ادارو غوښتنه وکړه چې د دې ډول پېښو د څرنګوالي، طرحې او پلان ځايونو په اړه دې څېړنې وکړي او د هغو عاملين دې ونيسي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن