خوست ښار : (پژواک، ٢١ زمرى ٩٦) : په خوست کې د پوليو ناروغۍ د مخنيوي او د واکسين د ښه تطبيق په موخه يو شمېر روغتيايي مرکزونو ته جايزې ورکړل شوې.
د ٢٧ عرادو موټر سايکلونو دغه جايزې د زمري په ۲۱مه د خوست د عامې روغتيا رياست له لوري شپږو ثابتو او يوه ګرځنده روغتيايي مرکزونو ته چې په سرحدي سيمو کې موقعيت لري، ورکړل شوې.
د خوست د عامې روغتيا رييس ډاکټر ګل حبيب شاه انصاري د دغو موټر سايکلونو د وېش پرمهال پژواک خبري اژانس ته وويل، له دې سره به هغو سرحدي سيمو ته د پوليو او د نورو ناروغيو واکسين پر ټاکلي وخت ورسيږي، چې وړاندې نه رسېده.
هغه زياتوي: ((هغه ستونزې چې موږ په لرې پرتو ولسواليو او يا سرحدونو کې لرلې او رسېده ګي مو ورته نه لرله، انشاالله د دغو موټر سايکلونو په توزيع سره به موږ هغو سپينو ساحو ته رسېده ګي وکړو او د واکسين د تطبيق په برخه کې چې کومه ستونزه وي هغه حل کړو.))
په همدې حال کې د خوست مرستيال والي شېربادشاه ارګوني پژواک خبري اژانس ته وويل، ولايتي اداره ژمنه ده چې د پوليو ويروس په مخنيوي او دغه راز د واکسين د پلي کېدو په برخو کې به شته ستونزو ته د پای ټکی کېږدي.
دی وايي: ((تېر کال د پکتيکا ولايت په برمل ولسوالۍ کې د پوليو شپږ مثبتې پېښې ثبت شوې دي، چې همدې اندېښنې ته په کتو موږ د عامې روغتيا وزارت سره په ګډه په خوست کې د پوليو ويروس د له منځه وړلو لپاره کمپاين پيل کړی، څو دلته کومه پېښه رامنځته نه شي.))
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن