غزني ښار(پژواک،٢٠ليندۍ٩٦): په غزني کې د ٦٠ ميليونه افغانيو په لګښت، درې پروژې تر جوړېدو وروسته ګټې اخيستنې ته وسپارل شوې.
د اطلاعاتو او فرهنګ سرپرست وزير رسول باوري د دې پروژو د پرانيستې په غونډه کې وويل چې په دې پروژو کې د غزني د اطلاعاتو او فرهنګ رياست، د موزيم او عامه کتابتون ودانۍ شاملې دي.
د ده د معلوماتو له مخې، د دې ودانيو پر جوړېدو ٦٠ ميليونه افغانۍ لګول شوي چې د دې وزارت له لوري ورکړل شوې دي.
باوري زياته کړه: (( د دې ودانيو جوړول ډېر مهم و په ځانګړي ډول عامه کتابخانه چې خلک بايد د مطالعې لپاره ورشي.))
نوموړي ژمنه وکړه چې په دې ولايت کې نړېدلې تاريخي سيمې به بېرته له سره رغوي.
دغه راز په ياده غونډه کې د غزني والي عبدالکريم متين وويل چې په دې ولايت يو شمېر تاريخي سيمې او ابدې بيا رغولو ته جدي اړتيا لري.
هغه وويل: (( غزني يو تاريخي ولايت دى او که تاريخي ابدې يي بيا ونه رغول شي نو له منځه به ولاړې شي.))
همدارنګه د غزني د اطلاعاتو او فرهنګ رياست استازي اسدالله وويل چې د ودانۍ د نشتون له امله يې اداري چارې له ګڼو ستونزو سره مخ وې.
هغه وايي: (( تلوېزيون، کتابتون، کلتور رياست، د ځوانانو مديريت ټول په يوځاى کې و چې له ډېر مشکل سره مخ و.))
ده وويل چې د نويو ودانيو په جوړېدو سره به يې ستونزه تر ډېره هواره شي.
د يادونې ده چې په ١٣٩٣ کال کې وسله والو طالبانو په غزني کې د ملي امنيت پر رياست بريد وکړ چې له امله يې د اطلاعاتو او فرهنګ رياست، عامه کتابتون، راډيو تلوېزيون، موزيم او د ځينو نورو دولتي ادارو ودانۍ ړنګې شوې.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن