کلات (پژواک، ٢٤ سلواغه ٩٦): د زابل دولتي چارواکي وايي چې د دغه ولايت له نيمايي ډېر ښوونځي د زده کوونکو پر مخ تړل شوي او په څلورو ولسواليو کې بيا هېڅ ښوونځی نشته.
د زابل د ولايتي شورا رييس عطا جان د سلواغې په ٢٤مه پژواک خبري اژانس ته وويل چې په دغه ولايت کې د نا امنيو له امله ٨٠ سلنه ښوونځي د زده کوونکو پر مخ تړل شوي دي.
هغه وايي چې د دغه ولايت په داى چوپان، اټغر، خاک افغان او نوبهار ولسواليو کې تر اوسه هېڅ ښوونځی نه دى جوړ شوى چې له امله يې د دې سيمو زرګونه اوسېدونکي له زده کړو پاتې دي.
ده وويل: ((سږ کال ٣٠٠ زابليان له دوولسم ټولګي فارغ شوي چې د ګوتو په شمېر څو تنه يې د زابل له ښوونځيو څخه دي او پاتې نور ټول په کابل کې له رحمان بابا او خوشحال خان لېسو فارغ شوي دي.))
دده وويل چې په دې ولايت کې د ښوونځيو د تړل کېدو له امله زرګونه زده کوونکي له زده کړو بې برخې پاتې دي.
دغه راز د ترينکوټ اوسېدونکي خان ګل پژواک ته وويل چې د دغه ولايت په ډېرو سيمو کې ښوونځي تړل شوي دي.
هغه وايي: ((په ځينو ځايونو کې مکتبونه تړل شوي او په کوم ځاى کې چې بيا مکتب شته هلته شاګردانو ته درسي مواد او نور مهم شيان پر خپل وخت نه رسېږي.))
همدارنګه د داى چوپان ولسوالۍ اوسېدونکي شاه محمود پژواک ته وويل چې په دې ولسوالۍ کې تر اوسه هېڅ ښوونځی نه دی جوړ شوى.
ده وويل: ((زموږ ټول ماشومان له درس نه پاتې دي، د هغو کسانو چې اقتصادي حالت ښه و، يا ترينکوټ ته تللي او يا هم نورو سيمو ته څو بچيان يې زده کړې وکړي خو نور همداسې پاتې دي.))
يادو کسانو ويل چې زابل تر ټولو وروسته پاتې ولايت دى، بايد حکومت يې د نورو برخو تر څنګ د پوهنې او روغتيا برخو ته ډېره پاملرنه وکړي.
د اړوندې موضوع په اړه د زابل د پوهنې رييس نصرالله زاهد هم وويل چې د دغه ولايت په څلورو ولسواليو کې تر اوسه ښوونځي نه دي جوړ شوي.
د هغه په وينا، په پلان کې لري چې په راتلونکي کال کې په يادو څلورو ولسواليو کې ښوونځي جوړ کړي.
ده زياته کړه: ((زما څه باندې يوه مياشت کېږي چې دلته رييس مقرر شوى يم، زه يې په اړه ډېر معلومات نه لرم چې ولې په دې ولسواليو کې ښوونځي نه دي جوړ شوي خو د راتلونکي کال په پلان کې مو شامل کړي دي.))
زاهد وويل چې په دې ولايت کې ټولټال ٢٢٤ ښوونځي دي چې له دې شميرې څخه ٩١ يې د زده کوونکو پرمخ تړل شوي دي.
زاهد وويل چې په يو شمېر سيمو کې د نا امنۍ له امله ښوونځي تړل شوي خو کره شمېر ورته معلوم نه و.
دغه راز د زابل والي خيال محمد حسيني پژواک ته وويل چې تېر کال په دغه ولايت کې يواځې يوه لېسه وه خو سږ کال يې شمېر لسو ته رسېدلى دى.
هغه په دې اړه نور جزئيات وړاندې نه کړل خو زياته یې کړه: ((د زابل د پوهنې رياست له تېرو فعاليتونو هېڅ راضي نه يم، خو له دې وروسته به هر څه سم شي او دغه برخه به پياوړې شي.))
والي هم د تړل شوو ښوونځيو شمېر په ډاګه نه کړ خو زياته يې کړه چې د تړل شوو ښوونځيو د خلاصون په موخه يې د قومي مشرانو په منځګړتوب هلې ځلې پيل کړې دي.
د يادونې ده، زابل د افغانستان د نا امنو ولايتونو له ډلې دى چې دا مهال د طالبانو تر څنګ داعش وسله وال هم په کې فعاليت لري.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن