زرنج(پژواک،١٨چنګاښ٩٧): د نیمروز ځايي چارواکي وايي چې له ایران څخه د کډوالو له راستنېدو وروسته په دغه ولایت کې پر نشه يي توکو روږدي کسان ډېر شوي، د شمېرو له مخې په دې ولایت کې د تېر کال په پرتله د روږدو کسانو شمېر نږدې درې برابره ډېر شوی .
د نیمروز د عامې روغتیا ریاست مسوول نثاراحمد فرهند پژواک خبري اژانس ته وویل، په نشه یي توکو د روږدو کسانو په اړه کره سروې نه ده شوې؛ خو اټکل کېږي چې په یاد ولایت کې به د روږدو کسانو شمېر ۳۰ زور ته رسېږي.
نوموړي زیاته کړه: (( داچې زیاتره کسان په کور کې نشه یي توکي کاروي نو ثبت نه دي او د روږدي له نومه د شرمېدو له امله ډېر کسان نه غواړي چې نومونه یې ثبت شي؛ نو له دې امله تر دې دمه کره سروې نه ده ترسره شوې.))
دا په داسې حال کې ده چې تېر کال د نیمروز د عامې روغتیا مسوولينو ویلي و چې په نیمروز کې د روږدو کسانو شمېر ۱۲ زره کسانو ته رسېږي.
بلخوا د یاد ولایت د عامې روغتیا ریاست کارکوونکي وايي، لږ تر لږه ۷۰ سلنه روږدي کسان هغه افغانان دي چې د کار لپاره ایران ته تللي او په نشه يي توکو له روږدي کېدو وروسته هېواد ته راستانه شوي دي.
نوموړي زیاته کړه، په وروستیو څو کلونو کې په دولتي او شخصي روغتونونو کې د دوه زره مېرمنو او ماشومانو په ګډون د لس زره روږدو کسانو درملنه شوې ده.
د یادونې ده چې په نیمروز کې د روږدو کسانو د درملنې یو ۷۰ بستريز دولتي روغتون، دوه خصوصي شلتره اود روږدو مېرمنو د درملنې یو ۲۰ بستريز روغتون فعالیت کوي.
د دغه ولایت له نشه یي توکو سره د مبارزې ریاست د معلوماتو له مخې، سږ کال په نیمروز کې کابو په ۱۱ زره هکتاره ځمکه نشه يي توکي کرل شوي؛ په داسې حال کې چې تېر کال هم پر همدې کچې ځمکې نشه يي توکي کرل شوي وو.
د زرنج ښار يواوسېدونکی غلام نبي چې نشه توکي کاروي پژواک خبري اژانس ته وویل: (( د کار لپاره ایران ته تللی وم؛ هلته په نشه يي توکو روږدی شوم او هېواد ته راستون شوم، څلور کاله کېږي په نیمروز کې اوسېږم؛ نه کور ته تللی شم او نه ایران ته.))
نوموړی چې پنځه زامن هم لري وايي: ((د یاد عمل د پرېښودو لپاره څو ځله دولت ته ورغلی یم خو چا راسره مرسته ونه کړه.))
پر نشه يي توکو بل روږدی اسلم چې اوس د درملنې په یوه مرکز کې بستر دی وویل، په خپله خوښه د درملنې یو مرکز ته تللی غواړي چې درملنه وکړي او په راتلونکې کې له خپلې کورنۍ سره یو ځای عادي ژوند وکړي.
د زرنج ښار يوه اوسېدونکي اختر محمد وویل، د روږدو کسانو د ډېرېدو یو لامل نشه يي توکو ته په ساده ډول د خلکو لاس رسى دی.
نوموړي زیاته کړه، د نیمرو چارواکو له نشه يي توکو سره د مبارزې په برخه کې هېڅ کار نه دی ترسره کړی او د نشه توکو له پرچون پلورونکو سره هم جدي چلندنه کېږي؛ له همدې امله په نشه يي توکو د روږدو کسانو شمېر زیاتېږي.
خو د نیمروز د والي ویاند سردار محمد همدرد وايي، په نیمروز کې د روږدو کسانو شتون لویه ستونزه ده، په دغه ولایت کې د ښځو او ماشومانو په ګډون ډېر کسان په نشه اخته دي.
نوموړي زیاته کړه، د نیمروز سیمه ییزه اداره د امکان تر کچې د روږدو کسانو د درملنې چارې پيل کړي او همدا اوس په دغه ولایت کې په دولتي او شخصي روغتونونو کې د ۴۰۰ روږدو کسانو د درملنې اسانتیاوې موجودې دي، دا اسانتیاوې بسنه نه کوي او یوه کمېسیون ته مو د نشه يي توکو دټولو پرچون پلورونکو د نیولو دنده سپارلې ده.
د نیمروز د والي مرستیال له نشه يي توکو سره د مبارزې له وزارت څخه په یاده برخه کې د نیمروز له سیمه ییزې ادارې سره د مرستې غوښتنه کوي.
Views: 5
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن