ښرنه- لښکرګاه (پژواک، ١٨ مرغومى ٩٧): امنيتي مسوولين وايي چې د افغان ځواکونو له لوري په پکتيکا کې پنځه طالبان وژل شوي او بلخوا په هلمند کې بيا څلور طالبان نيول شوي او يو ګمرک يې له منځه وړل شوى دى.
د پکتيکا د امنيې قوماندانۍ وياند شاه محمد ارين د مرغومي په ١٨مه پژواک خبري اژانس ته وويل چې تېره شپه وسله والو طالبانو د مرکز ښرنې اړوند د څلي پر پوستې ډله ييز بريد کړى دى.
هغه وايي چې په دغه بريد کې پنځه طالبان وژل شوي، درې طالبان او دوه پوليس ټپيان شوي دي.
د نوموړي په وينا، په دې جګړه کې د طالبانو درې فيلډر موټر، دوه کلاشينکوفونه، لس د راکټ مرمۍ او يو شمېر نورې وسلې او تجهيزات د امنيتي ځواکونو لاس ته ورغلي دي.
خو يوې بلې امنيتي سرچينې پژواک ته وويل چې په دې جګړه کې دوه پوليس هم وژل شوي دي.
دغه راز د يو بل خبر له مخې، په هلمند کې ځانګړو ځواکونو پر طالبانو عمليات کړي دي.
کندهار کې د ٢٠٥ اتل قول اردو د مطبوعاتي دفتر له لوري پژواک ته په رالېږل شوې خبرپاڼه کې راغلي چې ځانګړو ځواکونو تېره شپه د هلمند په ګرمسېر کې عمليات کړي دي.
خبرپاڼه کې زياته شوې چې په دغو عملياتو کې څلور طالبان او دوه شکمن کسان ژوندي نيول شوي دي.
سرچينه زياتوي چې د دغو عملياتو پر مهال د طالبانو يو شمېر اتاقونه، دوه دوکانونه او يو ګمرک چې د ملکي وګړو له موټرو به يې پيسې اخيستې هم له منځه وړل شوي دي.
د خبرپاڼې په حواله، د عملياتو پر مهال د طالبانو ١٤ موټر او ٢٠ موټرسايکلونه هم د امنيتي ځواکونو لاسته ورغلي چې له منځه يې وړي دي.
وسله والو طالبانو تر اوسه د يادو پېښو په اړه څه نه دي ويلي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن