مزارشريف (پژواک، ۲۷غويی، ۹۸): د بلخ ولايت په مرکز مزارشريف ښار کې د ۲۲ ولايتونو د څه باندې پنځه زره نجونو او هلکانو په ګډون د سيرت النبي سيالي تر سره شوه.
دغه سيالي نن د حضرت علی (رض) په روضه کې د بېلابېلو بنسټونو په مرسته او هڅو تر سره شوې.
د عبدالقادر توانا علمي او فرهنګي بنسټ يو له دغو بنسټونو دى.
د دغه بنسټ مشر عبدالرووف توانا پژواک خبري اژانس ته وويل، دغه سيالي په دې موخه تر سره شوه، چې ځوانان لا ډېر د حضرت محمد (ص) له سيرت او اخلاقو سره اشنا شي.
هغه زياته کړه چې له نبوي سيرت او اخلاقو سره د ځوانانو اشنا کېدل د دې سبب کېږي چې له دين او مذهب څخه د ناسمې ګټې اخيستو مخه ونيول شي.
دغه راز د ده په وينا د دې سيالۍ له لارې غواړي، چې خلکو کې د سولې، يووالي او يو بل منلو فرهنګ پياوړی کړي.
هغه وویل، چې له تېرو لسو کلونو راهيسې دوی هر کال د روژې مبارکې مياشتې په مناسبت د سيرت النبي سيالي جوړوي.
دى وايي، د هغو کسانو هر يوه ته چې په دغه سيالۍ کې لومړى، دويم او درېم مقام وګټي، يوۀ يوه نومره مځکه او شاوخوا ٣٣ زره افغانۍ ورکول کېږي.
دى زياتوي چې دغه کسان د عمرې حج ته هم لېږل کېږي او د پوهنتونونو لګښت يې هم ورکول کېږي.
د يوولسم ټولګي زده کونکې شفیقه چې په دغه سيالۍ کې يې برخه اخيستې ده، په دغه سيالۍ کې له ګډون خوښه ده.
هغې غوښتنه وکړه چې له ديني مسايلو سره د افغان ځوانانو د لا ډېر اشنا کېدو په موخه دې ورته نور پروګرامونه دې هم جوړ شي.
شفيقه وايي، چې په يوه مياشت مخکې د سيالۍ ګډونوالو ته ۴۹۹ پوښتنې ورکړل شوې وې او نن په سيالۍ که له همدغو پوښتنو سوالونه راوړل شوي و.
رحيمه بله نجلۍ ده، چې مزارشریف کې يې د سيرت النبي سياليو کې ونډه اخيستې.
هغه وايي، په دغې سيالۍ کې د برخې اخيستو تر ټولو لويه ګټه دا ده، چې ځوانان تشويقيږي څو خپل اعمال له نبوي اخلاقو سره برابر کړي.
د هغې په وينا ورته سیالۍ بايد د هيواد په نورو ولايتونو او زونونو کې هم جوړې شي.
په ورته وخت کې د ساداتو انجمن مشر سيد عبدالجبار اغا وايي چې د دغو سياليو د جوړېدو برخه کې ډېرو ټولنيزو او فرهنګي ټولنو برخه اخيستې ده.
د هغه په خبره د دوی انجمن به د سيالۍ درېيو هغو کسانو ته چې لومړى، دويم او درېم مقام خپلوي، مزارشريف ښار کې يوه يوه نمره ځمکه ډالۍ کړي.
Views: 3
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن