کابل (پژواک، ۲۷ لړم ۹۹): په افغانستان کې د اروپايي ټولنې سفير وايي چې له افغانستان سره د مرستو په تړاو په جينوا کنفرانس کې به د خپلو قوي همکاريو ژمنې را تازه کړي.
ټاکل شوې ده، چې دغه کنفرانس راتلونکې اوونۍ ( دوشنبه، سه شنبه) د افغانستان، ملګرو ملتونو او فنلينډ په ګډ کوربه توب د سويس هېواد په جينوا ښار کې ترسره شي.
د اروپايي ټولنې سفیر اندریاس وون برنټ نن د لړم په ٢٧مه، کابل کې ديوې خبري ناستې پر مهال وویل، چې د افغانستان په تړاو د جينوا کنفرانس کې به د اروپايي ټولنې يو لوړ پوړى پلاوى ګډون کوي.
هغه زياته کړه، د جينوا کنفرانس د افغان حکومت او نړيوالې ټولنې لپاره يو ښه چانس دى چې د تېرو څو کلونو لاسته راوړنو او د راتلونکو ننګونو ارزيابي وکړي.
د اروپايي ټولنې سفير وويل چې دوى له افغانستان سره اوږد مهاله همکارۍ لري او له تېرو څو کلونو راهيسې په سياسي او مالي برخو کې يې مرستې کړې دي.
د نوموړي په وينا، په ٢٠١٨ زېږديز کال کې د افغانستان په اړه د جينوا بين الوزارتي کنفرانس پر مهال اروپايي ټولنې له افغانستان سره د ٤٧٤ ميليونه يورو مرستې اعلان کړى و .
برنټ وويل چې دغه مرستې په ملکي برخو کې پر اصلاحاتو، عدلي او قضايي او ټاکنو برخو کې لګول شوې دي.
هغه زياته کړه، چې د جينوا د راتلونکې اوونۍ په کنفرانس کې به نړيواله ټولنه له افغانستان سره يوځل بيا د خپلو قوي همکاريو ژمنې تازه کړي.
د اروپايي ټولنې سفير هيله څرګنده کړه، چې افغان حکومت به هم د نورو ژمنو ترڅنګ د اداري فساد پر ضد د مبارزې ژمنې عملي کړي.
ده وويل چې د کرونا وبا نه يواځې افغانستان بلکې د اروپايي ټولنې اړونده هېوادونه هم سخت ځپلي، له افغانستان سره د پيوستون په موخه اروپايي ټولنې تر اوسه له کرونا سره د مبارزې په برخو کې د ١٤٦ ميليونه يورو مرسته کړې ده.
برنټ وايي، افغانستان په تېرو ١٩ کلونو کې د پام وړ پرمختګونه کړي چې د ښځو د حقوقو او په بېلا بېلو برخو کې د هغوى ګډون يو له مهمو لاسته راوړنو څخه شمېرل کېږي.
هغه زياته کړه، چې په دې وروستيو کې د سولې په برخه کې هم د پام وړ پرمختګ شوى .
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن