کابل (پژواک، ١٥ مرغومى ٩٩) : د اداري فساد پر وړاندې د مبارزې کمېسیون ته د شتمنیو د ثبت ادارې او د اداري فساد پر وړاندې د مبارزې د ځانګړي سکرټریټ د لېږد هوکړه لیک لاسلیک شو.
د چارو ادارې له خوا د مرغومي په ١٥مه، په يوه خپره شوې خبرپاڼه کې راغلي، چې د دې هوکړه ليک د لاسليک په مراسمو کې د چارو ادارې لوی ريیس ډاکتر فضل محمود فضلي وویل، چې په جمهوري ریاست کې بېلا بېلو ادارو لکه د شتمنیو د ثبت ادارې، د اداري فساد پر وړاندې د مبارزې ځانګړي سکرټریټ او بازرس ادارې له اداري فساد سره د مبارزې په موخه فعالیت درلود.
هغه زياته کړې، چې د اداري فساد پر وړاندې د مبارزې کمېسیون له جوړېدو سره په لومړي پړاو کې د شتمنیو د ثبت اداره او د اداري فساد پر وړاندې د مبارزې ځانګړی سکرټریټ دغه کمېسیون ته ولېږدول شول او د فساد پر وړاندې د مبارزې هڅې تر واحد چتر لاندې راغلې.
د فضلي په وينا، د شتمنیو د ثبت اداره کې کافي ظرفیتونه رامنځته شوي، کمېسیون دې د دغه ریاست له ظرفیتونو پوره ګټه واخلي.
هغه وايي، د اداري فساد پر وړاندې د مبارزې ځانګړی سکرټریټ، نړیوالې ټولنې او بنسټونو ته د فساد پر وړاندې د مبارزې ښه میکانیزمونه جوړ کړي، چې له دغو ظرفیتونو هم باید ګټه واخیستل شي.
د اداري فساد پر وړاندې د مبارزې د کمېسیون ريیس څارنپال عبدالقیوم نظامي د دغه کمېسیون تر چتر لاندې د یادو ادارو د لېږد بهیر څخه په هرکلي سره وویل، چې له اداري فساد سره مبارزه یو ستونزمن، پېچلی او حساس کار دی او د کمېسیون یو پروګرام دا دی، څو موازي ادارې خپل چتر ته ولېږدوي.
هغه زیاته کړه، چې د دغو ادارو له شته ظرفیتونو د استفادې ترڅنګ به دا ظرفیتونه لا پیاوړي کړل شي.
Views: 3
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن