کابل (پژواک ۱۳ غبرګولی ۱۴۰۰): د کابل پولیس وايي، د کابل ښار په پل سوخته سيمه کې پر يوه ټونس موټر چاودنه شوې چې لږ تر لږه نهو کسانو ته مرګ ژوبله اوښتې ده.
د کابل د پوليسو وياند فردوس فرامرز وايي، دغه چاودنه نن ماښام کابو ۷ بجې د شپږمې ناحيې اړوند د پل سوخته سيمې د عبدالعلي مزاري څلور سره نږدې شوې ده.
ده زياته کړې، له دې پېښې څخه څلور جسدونه او پنځه ټپیان روغتون ته وړل شوي د؟ي.
د هغه په وينا، په دې پېښه کې يو سراچه موټر چې له ټونس سره نږدې و، هم اور اخیستی دی.
د دغې چاودنې مسوولیت تراوسه پورې چا په غاړه نه دی اخیستی.
نن ماسپښین هم د شپږمې ناحیې د چهاردهي د چهار قلعه پر عمومي سړک پر یوه شخصي ټونس موټر د ماین چاودنه شوې وه چې څلور تنه په کې وژل شوي او څلور نور ژوبل شوي وو.
دوه ورځې مخکې د کابل د درېیمې حوزې اړوند پر دوو لیني کاسټرو موټرو د دوو چاودنو له امله ۱۰ کسان وژل شوي او ۱۲ نور ټپيان وو.
Views: 28
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن