[restrict paid=”true”]
ترینکوټ (پژواک، ۲۶ غبرګولی ۱۴۰۱): د اروزګان د کرنې ریاست مسوولین او کروندګر وايي، سږ کال په دغه ولایت کې د غنمو حاصلات ۸ سلنه کم شوي چې لامل یې وچکالي، د تریاکو کښت او کروندګرو ته پر وخت د غنمو اصلاح شوي تخم او سرې نه ورکړه ده.
د اروزګان کروندګر هر کال د نورو کښتونو ترڅنګ په پراخه کچه غنم هم کري چې په وسیله یې هم خپلې اړتیاوې پوره کوي او هم یې پر نورو یې پلوري.
د اروزګان د کرنې او مالدارۍ ریاست د کرنې برخې د ترویج مدیر انجنیر قدرتالله حمیدي پژواک خبري اژانس ته وویل، تېر کال د دغه ولایت پر ۲۷زره ۱۲۸ هکتاره ځمکه غنم کرل شوي وو، خو سږ کال پر ۲۴زره ۹۵۷ هکتاره ځمکه غنم کرل شوي چې د تېر په پرتله ۸ سلنه کموالی ښيي.
هغه زیاته کړه، تېر کال د اروزګان کروندګرو له خپلو ځمکو ۹۱زره ۹۵۱ متریک ټنه غنم تر لاسه کړي وو، خو سږ کال یې ۸۴زره ۵۹۴ متریک ټنه غنم تر لاسه کړي چې د دغه ولایت د وګړو یوازې ۶۰ سلنه اړتیا پوره کولای شي.
دی وايي، سږ کال په دغه ولایت کې د وچکالۍ له امله للمي غنم نه دي کرل شوي چې دا هم د حاصلاتو د کمښت یو لامل دی.
د نوموړي په خبره، په همدې بنسټ یې امنیتي ارګانونو ته مکتوب لېږلی چې له دغه ولایت څخه د باندې د غنمو د لېږد مخنیوی وکړي، څو په راتلونکي کې د دغه ولایت اوسېدونکي د غنمو له کمښت سره مخ نه شي.
حمیدي زیاتوي، په ټوله کې وچکالي، د تریاکو کښت او کروندګرو ته پر وخت د غنمو د اصلاح شوي تخم او سرې نه ورکړه هغه لاملونه دي چې سږ کال په اروزګان کې د غنمو حاصلات کم شي.
دی وايي، د کرنې ریاست د مرکز ترینکوټ په ګډون په ځینو ولسوالیو کې د غنمو اصلاح شوی تخم ووېشه، خو ټولو کروندګرو ته یې د ورکولو توان نه درلود.
نوموړي هیله وښودله چې په راتلونکي کال کې دا ستونزې حل شي او دغه ولایت به وکړای شي د اړتیا وړ غنم او نور کرنیز محصولات ولري.
اروزګاني کروندګر هم وايي، سږ کال یې د غنمو د حاصلاتو کچه ټیټه وه او ونه توانېدل چې د خپلو کورنیو د اړتیا وړ غنم تر لاسه کړي.
د مرکز ترینکوټ یوه کروندګر سردار ولي پژواک خبري اژانس ته وویل، سږ کال وچکالي او د غنمو د کرکیلي پر مهال د کروندګرو له خوا کښتونو ته د کېمیاوي سرې نه ورکړه، د دې لامل شوه چې حاصلات یې کم شي.
یو بل کروندګر وحیدالله بیا د کرنې ریاست پر مسوولانو نیوکه کوي چې له هغوی سره یې د اصلاح شوو تخمونو او کېمیاوي سرې مرسته و نه کړه نو ځکه یې حاصلات کم شول.
د یادونې ده چې د اروزګان ترڅنګ د هېواد په نورو سوېلي ولایتونو کې هم سږ کال د غنمو حاصلات لږ وو.
د اروزګان کروندګر له مسوولانو غواړي چې په دغه ولایت کې د اوبو سرچینو د پراختیا او کرنې د ودې په موخه د اوبو بندونه وتړي او وخت په وخت دې ورسره د اصلاح شوو تخمونو او کېمیاوي سرې مرسته وکړي.
[/restrict]
Views: 49
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن