میدانښار (پژواک، ۲۰ زمری ۱۴۰۱): د میدان وردګو د شهیدانو او معلولینو ریاست وايي، په دغه ولایت کې يې په تېرو جګړو کې د وژل شوو کسانو د یتیمانو د نومليکنې لړۍ پيل کړې او له اتلس کاله کمعمره هر یتیم ته به د میاشتې ۲۰۰۰ افغانۍ ورکوي.
د یاد ولایت د شهیدانو او معلولینو ریاست مرستیال مولوي نیازمحمد پژواک خبري اژانس ته وویل: «موږ له توپير پرته د هغو یتیمانو د ثبت لړۍ پيل کړې چې په تېرو جګړو کې يې خپل والدین له لاسه ورکړي.»
ده وویل چې تر اوسه د تېر او اوسني نظام ۶زره کورنۍ ثبت شوې دي.
نوموړي زياته کړه: «له اتلسو کلنو کم عمره هر یتیم ته به د یو کال لپاره د حکومت له بودجې هره میاشت ۲۰۰۰ افغانۍ ورکول کېږي.»
د هغه په وینا، هڅه کېږي چې د ولایت په کچه هېڅ کورنۍ له دې سروې پاتې نه شي.
هغه وویل: «امارت ټولو یتیمانو ته هغه که هر څوک ده، خو چې یتیم ده، که د مجاهدینو ده، که د اردو ده، که د ملکي ده، ټولو ته بدون له کوم توپیر کوم حقوق چې حواله شوي دي ورکوي.»
نوموړي زياته کړه چې د یتیمانو د ثبت لړۍ شفافه ده او یتیم باید د کلي د امام او ولسوالۍ له خوا تایید شي.
Views: 310
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن