کابل (پژواک، ۲۴ زمری ۱۴۰۲): ملګري ملتونه وايي، د ا.ا واکمنۍ له دوکلنې کېدو سره هممهاله یې په افغانستان کې د نجونو زدهکړو لپاره کمپاین پیل کړی دی.
د وړم کال د زمري په ۲۴مه د افغانستان پخوانی حکومت له منځه ولاړ او ځای یې اوسني سرپرست حکومت ونیو.
نن د اسلامي امارت د بیا واکمنېدو ۲۴ میاشتې پوره شوې.
په افغانستان کې د ملګرو ملتونو سیاسي استازولۍ (یوناما) نن پر خپله فېسبوکپاڼه لیکلي: «واک ته دوه کاله وړاندې په افغانستان کې د طالبانو له رسېدو او د نجونو پر منځنیو او لوړو زدهکړو له بندیز وروسته – په بېړنیو او اوږدمهاله بحرانونو کې د زدهکړو لپاره د ملګرو ملتونو نړۍوال وجهي صندوق – د افغان نجونو غږ یو دردوونکی کمپاین پیل کړ چې عنوان یې دی «تعلیم انتظار نه شي کولی.»؛ دغه کمپاین په نړۍواله کچه د هغو ځوانو افغان نجونو غږ پورته کوي چې د زدهکړو له اساسي حق څخه بې برخې دي.
سرچینې دغه راز لیکلي چې د ۲۰۲۱ د اګسټ له ۱۵مې وروسته د افغان ښځو لپاره هر څه بدل شول او دا دی له هغې مودې دوه کال پوره کېږي خو اوس هم دا محدودیتونه شتون لري چې د افغان مېرمنو د ژوند پر هر اړخ اغېز کوي.
دا په داسې حال کې ده چې په هېواد کې وړم کال د زمري میاشتې له سیاسي بدلون وروسته، د ۱۴۰۱ کال د وري مياشتې په لومړيو کې اسلامي امارت په افغانستان کې د نجونو له شپږم ټولګي پورته ښوونځيو او د همدغه کال په لېندۍ میاشت کې د نجونو پوهنتونونو فعالیت تر دویم امر پورې وځنډاوه، خو ویلي یې دي چې دغه پرېکړه دایمي نه ده او هڅې روانې دي چې د اسلامي شریعت په چوکاټ کې ورته حللاره پیدا شي.
Views: 96
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن