کابل (پژواک، ۸ وږی ۱۴۰۲): د ټولګټو وزارت وایي، د شمال لویه لار ۱۱ ورځې وروسته د سالنګ تونل کې د کانکرېټاچونې چارو تر بشپړېدو د هر ډول ترافیکو پر مخ تړل کېږي.
اوس مهال د سالنګ لویې لارې د ۸۰ کیلومتره سړک بیارغونې او ترمیم کار روان دی، له همدې امله د تېرې زمري میاشتې له ۱۳مې پر یاده لار یوازې د شپې له خوا په نوبت، یوه شپه له شمال څخه جنوب او بله شپه له جنوب څخه شمال ته د تګ اجازه ورکول کېږي.
د ټولګټو وزارت د مطبوعاتو مسوول محمداشرف حقشناس نن پژواک خبري اژانس وویل: «د سالنګونو لویې لارې د تونل په دننه برخه کې د کانکرېټاچونې او د پروژې غوره تطبیق په موخه دغه لویه لار د وږي میاشتې له ۱۹مې د تونل د کانکرېټاچونې کار تر بشپړېدو پورې د هر ډول ترافیکو د تګ راتګ پر مخ تړل کېږي.»
حقشناس وایي، ټول هېوادوال، ملي سوداګر او موټرچلوونکي دې د ۱۱ ورځو په لړ کې اړوند اړتیاوې پوره کړي.
هغه وویل چې د ترافیکو پر مخ د یادې لارې تړل کېدو کره موده نه ده معلومه، خو کېدای شي چې د کانکرېټ چارې یې له میاشتې زیات وخت واخلي.
Views: 767
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن