پلخمري (پژواک، ۲۱ لړم ۱۴۰۲): د بغلان اوسېدونکي وايي، په هېواد کې د ډالرو بیې له لوړوالي سره ډېر ژر د خوراکي توکو بیې هم لوړېږي، خو له ښکته کېدو سره يې بیا د خوراکي توکو نرخونه نه ټيټېږي.
د راپورونو له مخې، شاوخوا یوه میاشت مخکې یو ډالر ۷۷-۷۸ افغانیو پورې تبادله کېده خو دا مهال د یوه ډالر نرخ شاوخوا ۶۷ افغانیو ته را ښکته شوی دی.
د اړوندې موضوع په اړه د بغلان د مرکز پلخمري اوسېدونکي بشیرخان پژواک ته وویل، کله چې د ډالرو نرخ لوړ شي سمدستي ورسره د خوراکو توکو بيې هم لوړېږي، خو کله چې ښکته شي بیا نرخونه نه ټيټېږي.
هغه زیاتوي: «یوه میاشت وړاندې چې یو ډالر په ۷۷ افغانۍ و د یوه کیلو بورې بیه ۷۵ افغانۍ وه اوس چې یو ډالر له ۷۰ افغانیو ښکته شوی، بیا هم د بورې بیه پخوانۍ ده.»
دغه راز، د بغلان یوه بل اوسېدونکي ګلعالم هم پژواک ته وویل، یوه میاشت وړاندې چې د ډالرو بیه لوړه وه هم د یوې بورۍ قزاقي اوړو بیه ۱۶۰۰ افغانۍ وه او اوس هم ده.
په ورته وخت کې د پلخمري ښار یوه هټۍوال رفیعالله پژواک ته وویل چې هټۍوال نه شي کولای د توکو نرخونه لوړ یا ښکته کړي، دغه کار باید سوداګر وکړي.
هغه وویل: «مونږ نرخونو کې تغیر نه شو راوستی، که لوړ يې واخلو مجبور لوړ یې خرڅ کړو او که ټیټ يې واخلو بیا يې ټیټ خرڅوو، دا د سوداګرو کار دی چې توکي هټۍوالو ته د ورځې له نرخ سره سم ورکړي.»
یو شمېر نورو کسانو هم ورته څرګندونې وکړې او له حکومته يې د خوراکي توکو د بیو کنټرول غوښتنه وکړه.
په دې اړه د پلخمري ښاروالۍ د مالي او اداري چارو مسوول شیرمحمد احمدزي پژواک ته وویل چې د ښاروالۍ له لوري هټۍوالو ته د توکو پلورلو لپاره نرخنامه ورکړل شوې ده.
هغه وايي، که کوم هټۍوال له ټاکلي نرخ څخه په لوړه بیه توکي وپلوري نو مجازات به شي.
دی وايي: «ملي سوداګر په ګاونډیو هېوادونو کې توکي په ډالرو رانیسي او دلته په افغانستان کې د ډالرو بیه د ډېر وخت لپاره یو شان نه وي، ښکته او پورته کېږي، سوداګر اړ دي چې له زیان څخه د مخنیوي په موخه د خوراکي توکو بیو کې له احتیاطه کار واخلي، دغه کار بیا د دې لامل کېږي چې د ډالرو ارزښت په کمېدو مارکېټونو کې سملاسي د توکو بیو کې کموالی نه راځي.»
د یادونې ده، له دې مخکې د کابل او یو شمېر نورو ولایتونو اوسېدونکو هم ورته شکایتونه کړي او له حکومته يې د دې ستونزې د حل غوښتنه کړې وه.
Views: 93
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن