لښکرګاه (پژواک، ۲۵ لېندۍ ۱۴۰۲): د هلمند سیمهییز مسوولین وايي چې د اوبو کموالي له امله به د کجکي برېښنا د ۴۰ ورځو لپاره بنده وي.
د هلمند د اطلاعاتو او فرهنګ ریاست مرستیال مولوي محمدقاسم ریاض پژواک خبري اژانس ته وویل چې په دې وروستیو کې د کجکي بند اوبو کچه ډېره ټیټه شوې ده.
هغه وايي چې د برېښنا او کرنې ریاستونو د ګډې هوکړې له مخې به د کجکې بند برېښنا او اوبه د ۴۰ ورځو لپاره بندې وي.
نوموړي زیاته کړه: «که بارانونه وشي او اوبه زیاتې شي نو بېرته به اوبه خوشې او برېښنا به وصل شي خو که اوبه لږې وي نو ۴۰ ورځې به برېښنا غیرفعاله او اوبه به بندې وي.»
د هغه په خبره، څو چې د کجکي برېښنا بېرته فعالېږي، په هر ۲۴ ساعتونو کې به یو ساعت جنراتوري برېښنا د لښکرګاه ښار ته ورکول کېږي څو ښاریان خپلې لومړنۍ اړتیاوې پوره کړي.
د یادونې ده، له دې مخکې هم ځیني وختونه د کال په دغه موسم کې د کجکي اوبه د ۴۰ ورځو لپاره بندې شوې دي.
دا په داسې حال کې ده چې د کجکې بند له برېښنا د هلمند د خلکو ترڅنګ د کندهار خلک هم استفاده کوي.
Views: 227
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن