میدانښار (پژواک، ۱۷ سلواغه ۱۴۰۲): د کلیو پراختیا او بیارغونې وزارت وایي چې په میدانوردګو ولایت کې د څه باندې ۳۲۳ میلیون افغانیو په لګښت د ۴۵۱ بېلابېلو پروژو چارې بشپړې او ګټې اخیستنې ته وسپارل شوې.
د یاد وزارت خبرپاڼه کې راغلي چې یادې پروژې د میدانوردګو په مرکز میدانښار، جلرېز او د بهسودو لومړۍ حصې ولسوالیو په یو شمېر کلیو کې پلې شوې دي.
سرچينې لیکلي: «په دغو پروژو کې د ۱۳۴۶۰۲۲ مترو په اوږدوالي د کانالونو پاکول، پر ۳۸۵۲۰۲ مترو کلیوالي لارو جغل اچول، د ۳۳۸۱ مترو په اوږدوالي د استنادي دېوالونو رغول، د ځمکو خړوبولو لپاره د ۴۰ ذخیرو پاکول، د غره لمن کې د ۱۹۸۵ ابرېزونو کیندل، د ۱۵۱ پلچکونو جوړول، د ۷،۵ مترو په اوږدوالي د یوه پُل رغول او د څښاک پاکو اوبو رسولو څلورو څاګانو ترمیم شامل دي.»
خبرپاڼه زیاتوي، د یادو پروژو د کار په جریان کې نږدې ۱۶ زره کسانو ته د کار زمینه برابره شوې وه.
د کلیو پراختیا او بیارغونې وزارت لیکلي چې د یادو پروژو په بشپړېدو به اړوندو برخو کې د مرکز او نوموړو ولسوالیو د اوسېدونکو ستونزې هوارې شوې.
Views: 50
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن