مزارشریف (پژواک، ۱۳ وری ١۴٠۳): د بلخ ولایت چمتال ولسوالۍ د بېلابېلو سيمو يو شمېر اوسېدونکي د څښاک پاکو اوبو ته له نه لاسرسي شکايت لري او د دې ستونزې د حل غوښتنه کوي.
په همدې حال کې د بلخ سیمهییز چارواکي هم دا ستونزه تاییدوي او پر هواري یې ټینګار کوي.
د چمتال ولسوالۍ د پشمقلعه سيمې اوسېدونکي ګلمحمد پژواک ته وويل، د څښاک پاکو اوبو ته د نه لاسرسي له امله هره ورځ څو کيلومتره مزل کوي څو ورته لاسرسى پيدا کړي.
هغه وويل: «زموږ ستونزې ډېرې دي؛ ماشومان مو له سینده اوبه راوړي، له درس او زدهکړو بېبرخې دي، له اسلامي امارته غواړو چې زموږ لپاره د اوبو څاهګانې او ذخیرې جوړې کړي، څو له دې ستونزو خلاص شو.»
د چمتال ولسوالۍ بل اوسېدونکی سخيداد وايي، د دې ولسوالۍ پشمقلعه سیمه کې تر شپږ سوه پورې کورنۍ د څښاک پاکو اوبو ته لاسرسی نه لري.
نوموړی دغه وضعیت د دوی لپاره ستونزمن ګڼي او له مسوولو بنسټونو د همکارۍ او مرستې غوښتنه کوي.
دغه راز، د چمتال ولسوالۍ یوه قومي مشر محمدنذیر هم وویل چې یاده ولسوالۍ کې ډېری خلک پاکو اوبو ته لاسرسی نه لري او له ویالو او ډنډونو خپل د اړتیا اوبه پوره کوي.
هغه زیاتوي چې دغه اوبه نه یوازې چې صحي نه دي بلکې د وچکالۍ او واورې ورښتونو پر مهال لاسرسی ورته تر دې هم ستونزمن وي.
د چمتال ولسوالۍ يو شمېر نور اوسېدونکي بيا وايي، د څښاک پاکو اوبو ته لاسرسي برخه کې له پرلهپسې غوښتنو سره سره، تر اوسه په دې برخه کې کومه پاملرنه نه ده شوې.
ورته مهال، د چمتال ولسوال نورالله همام هم د خلکو دغه ستونزه پر ځای بولي او پر حل کېدو یې ټینګار کوي.
هغه زیاته کړه: «وروستیو کې چې یو شمېر نور کلي هم دې ولسوالۍ سره یوځای شوي، په ټوله کې په دغه ولسوالۍ کې ۹۰ کلي دي چې د پشمکلا، جرکلا، نوشار، امامصاحب او ډېر نور کلي د اوبو ستونزې لري.»
د هغه د شمېرنې له مخې، څه باندې ۳۰ کلي په دغه ولسوالۍ کې پاکو اوبو ته لاسرسی نه لري.
هغه وویل، تر خپلې وسې هلې ځلې کوي څو د یادو خلکو دغه ستونزه حل کړي.
ولسوال په پلازمېنې کابل کې هم له حکومتي مسوولینو غوښتنه وکړه چې د یادې ستونزې په حل کې ورسره همکاري وکړي.
د يادونې ده چې د چمتال ترڅنګ د بلخ په یو شمېر نورو ولسواليو کې هم خلک د څښاک پاکو اوبو ته لاسرسى نه لري.
Views: 15
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن