غزني، قلعهنو، چاریکار (پژواک، ۱۵ غبرګولی ۱۴۰۳): ځايي مسوولین وايي چې په غزني، پروان او بادغیس ولایتونو کې د جلا ترافیکي پېښو له امله دوه کسان مړه او ۱۲ نور ټپیان شوي دي.
د غزني امنیې قوماندانۍ ویاند ابوخالد سرحدي پژواک خبري اژانس ته وویل چې نن سهار شاوخوا اووه بجې د دغه ولایت د اندړو ولسوالۍ په مربوطاتو کې د کابل – کندهار پر لویه لار درېیو موټرونو سره ټکر کړی دی.
نوموړي زیاته کړه، یاده پېښه کې یو کس مړ شوی او څلور نور ټپيان شوي دي.
د هغه په وینا، د پېښې ټپیان د درملنې په موخه روغتون ته لېږدول شوي او روغتیایي حالت یې د ډاډ وړ ښودل شوی دی.
د غزني امنیې قوماندانۍ ویاند د پېښې لامل د موټرچلوونکو بېاحتیاطي او ترافیکي قوانینو ته نه پاملرنه یادوي.
بلخوا، د پروان امنیه قومانداني وايي چې نن سهار د دغه ولایت د سیاهګرد ولسوالۍ په پل رنګاب سیمه کې د دوو موټرسایکلونو د ټکر له امله یو کس مړ شوی او دوه نور ټپیان شوي دي.
د یاد ولایت امنیې قوماندانۍ ویاند عبدالرحیم مسکینیار وویل، یاده پېښه د سیاهګرد ولسوالۍ په پل رنګاب سیمه کې شوې او ټپیان د دې ولسوالۍ ایمرجنسي روغتون ته لېږدول شوي دي.
دغه راز، د بادغیس ولایت په بالامرغاب ولسوالۍ کې د ترافیکې پېښې له امله شپږ کسان ټپيان شوي دي.
د بادغیس امنیې قوماندانۍ په خبرپاڼه کې راغلي چې تېره شپه د دغه ولایت بالامرغاب ولسوالۍ په پل کهنه سیمه کې د فاریاب – بادغیس پر لویه لار یو سراچه موټر له سړک وتلی او چپه شوی دی.
هغه زیاته کړه، په یاده پېښه کې شپږ کسان ټپیان شوي چې ټول د بادغیس ولایتي روغتون ته لېږدول شوي دي.
هغه د پېښې لامل د لارې خرابوالی او د موټرچلوونکي بېاحتیاطې بولي.
Views: 15
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن