کابل (پژواک ٥ کب ٩١): د ميدان وردګو په نرخ ولسوالۍ کې د حزب اسلامي او وسله والو طالبانو ترمنځ نښته کې د حزب اسلامي د يو قوماندان د وژل کېدو خبر ورکړل شو.
د ميدان وردګو د والي وياند عطاء الله خوګياڼي د کب په ٥مه پژواک خبري اژانس ته وويل، چې دا نښته بېګا شپه د نرخ ولسوالۍ د توکرک په سيمه کې شوې ده.
هغه ادعا وکړه، چې په دې نښته کې د حزب اسلامي يو ځايي قوماندان سميع الله د طالبانو د يوه ډلمشر فيض الله له لوري وژل شوى دى.
نوموړي وويل، چې اوس په سيمه کې وضعيت ارام دى.
پژواک اژانس هڅه وکړه چې د ياد طالب قوماندان او يا هم د طالبانو د وياند نظر واخلي خو بريالى نه شو.
د يادونې ده، له تېرو دوو کلونو راهيسې په نرخ ولسوالۍ کې د حزب اسلامي او وسلوالو طالبانو ترمنځ جګړې کېږي، چې له امله يې تر اوسه دواړو لورو ته درنه مرګ ژوبله اوښتې ده.
Views: 12
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن