کندهار ښار ( پژواک ٦ غويى ٩٢ ) : د کندهار ولايت امنيه قوماندان جنرال عبدالرازق له يوې چاودنې روغ ووت .
د کندهار د والي وياند جاوېد فيصل د غويي په ٦مه، پژواک خبري اژانس ته وويل ،چې امنيه قوماندان جنرال رازق خان نن سهار ميوند ولسوالۍ ته د ترافيکي پېښې د څېړلو لپاره سيمې ته تللى وو.
هغه زياته کړه، کله چې هغه بېرته د کندهار ښار پر لوري را روان و، نو په لاره کې پرې د ريموټ کنټرول ماين چاودنه وشوه، خو هغه ترې روغ ووت .
د فيصل په وينا، په دې چاودنه کې د جنرال رازق د موټرو کاروان او ساتونکو ته هيڅ زيان نه دى اوښتى.
نن سهار وخته د کندهار او هلمندپر لويه لاره د ميوند ولسوالۍ په مربوطاتو کې د ٣٠٣ موټر او ټېلر ترمنځ د ټکر له امله ٤٥ تنه مړه او ١٠ نور ژوبل شوي دي.
د يادونې ده ، چې تر دې مخکې هم پر رازق خان چاودنې او ځانمرګي بريدونه شوي، خو هغه ترې روغ وتلى دى.
