يوه ډله وسله وال د سولې له پروسې سره يوځاى شول

جلال اباد (پژواک ١٠ مرغومى ٩٢): په ننګرهار کې د سولې له ولايتي کمېټې سره د وسله والو مخالفينو يوه لس کسيزه ډله يو ځاى شوه.

د ننګرهار د سولې ولايتي شورا منشي مولوي عباس د مرغومي په ١٠مه پژواک خبري اژانس ته وويل، چې يادې لس کسيزې ډلې له دې مخکې  د ننګرهار په کوټ، بټي کوټ، رودات او اچين ولسواليو کې ورانکارې کړنې ترسره کولې.

 هغه زياته کړه، چې د دې ډلې په يو ځاى کېدو کې پر ملي امنيت سربېره د سولې له کمېټې سره يوځاى شوو پخوانيو قوماندانانو هم هلې ځلې کړې دي.

د نوموړي په وينا، راغلو مخالفينو له ځان سره اته ميله وسله هم راوړې ده.

د يادې ډلې قوماندان فرمان پژواک اژانس ته وويل، وروسته له دې به د دولت پر ضد له ورانکاره کړنو لاس اخلي.

 هغه زياته کړه: ((تراوسه نه پوهېدو، له دې وروسته به د خپل ولس په ګټه کار کوو، موږ خو د پاکستان اى اېس اى غولولو، پيسې يې راکولې.))

نوموړي په خپله اعتراف وکړ، چې مخکې غولېدلى، خو وروسته له دې به په سيمه کې د ورانکاره کړنو مخه نيسي.

دى وايي، چې په ګاونډي هېواد پاکستان کې د  وسله والو مخالفينو د روزنې مرکزونه موجود دي او د هغوى پر پيسو روزل کېږي او هېواد ته د ورانکاره فعاليتونو په موخه را استول کېږي.

 د سولې له بهير سره يو ځاى شوى وسله وال چې خپل نوم سبحان الله ښيي پژواک ته وويل، دوى ته د پاکستان د اى اېس اى له خوا پيسې ورکول کېدې، چې په افغانستان کې ورانکاره کړنې وکړي.

هغه زياته کړه: ((ډېرې پيسې به يې موږ ته په هدفي ماينونو راکولې، خو ټولې زموږ جېبونو ته نه تلې.))

ده پر نورو وسله والو غږ وکړ، چې د خپل هېواد له ورانۍ دې لاس واخلي او د هېواد په ابادۍ کې دې رغنده رول ولوبوي.

ياده دې وي، چې تر دې مهاله د سولې له ولايتي کمېټې سره شاوخوا ٢٥١وسله وال له سپکو او درنو وسلو سره يو ځاى شوي دي.