خوست (پژواک ١٠ لړم ٩٣): د خوست چارواکي وايي، د دې ولايت په سرحد کې پاکستانيو مامورينو ۲۹ تنه افغانان، چې په پاکستان کې د دغه هېواد د ځواکونو له لوري نيول شوي وو، افغان حکومت ته وسپارل.
د خوست د والي وياند مبارز محمد ځدراڼ پژواک خبري اژانس ته وويل، چې يادو کسانو کوم ښکاره جرم نه دی کړی، خو د پاکستان د پوليسو په وينا، د هويت د قانوني اسنادو د نه لرلو له امله د هغه هېواد په بېلابېلو سيمو کې نيول شوي وو.
ده زياته کړه، دغه بنديان د افغانستان او پاکستان د سفارتونو ترمنځ د ډيپلوماتيکو اړيکو په ترڅ کې د يوې هوکړې له مخې، نن د خوست ولايت په يوه سرحدي سيمه کې افغان حکومت ته وسپارل شول.
هغه دغه راز وويل، د پاکستانيو ځواکونو له لوري دغه نيول شوي کسان ځکه د خوست امنيتي ځواکونو ته وسپارل شول، چې د نورو ولايتونو په پرتله دغه سيمه نږدې بلل شوې ده.
که څه هم مبارز ځدراڼ د يادو ۲۹ افغانانو د سپارلو سيمه او دقيق وخت په ګوته نه کړ، خو ويې ويل، چې په دغو کسانو کې د افغانستان د بېلابېلو ولايتونو اوسېدونکي شامل دي.
تر اوسه نه ده څرګنده شوې، چې ياد کسان پاکستانيو پوليسو کله نيولي او د څومره وخت لپاره يې په زندان کې ساتلي وو.
د خوست د والي له دفتره پژواک اژانس ته په رالېږل شوې خبرپاڼه کې راغلي، چې افغان حکومت ته دغه سپارل شوي کسان به ډېر ژر له خپلو کورنيو سره يو ځای کړي.
