محمودراقي (پژواک، ٣ ليندۍ ٩٥): د يو ميليون امريکايي ډالرو په ارزښت د کاپيسا لپاره د زندان نوې ودانۍ جوړه او ګټې اخيستنې ته وسپارل شوه.
د اول کوهستان ولسوال عبدالفتاح شفيق د ليندۍ په ٣مه، پژواک خبري اژانس ته وويل چې دا ودانۍ د يو نيم کال په موده کې په پاخه او عصري بڼه جوړه شوې ده.
هغه زياته کړه چې د کاپيسا زندان د نساجي فابريکې په پخوانيو خونو کې جوړ شوى و چې د کورنيو چارو وزارت له خوا يې کرايه ورکول کېده.
ولسوال وايي چې پخوانۍ ودانۍ کې ستونزې ډېرې وې ، د ژمي او اوړي پر مهال به زندانيان له ګڼو ستونزو سره مخ وو.
شفيق وويل چې نوې و دانۍ د کوهستان ولسوالۍ په ختيځه څنډه مې جوړه شوې چې يو ميليون ډالر لګښت پرې راغلی دی او يو بلاک يې د ښځو او ماشومانو لپاره جلا دى.
د دويم کوهستان ولسوالۍ يو اوسېدونکى شفيق وايي چې ورور يې يو نيم کال راهيسې زنداني دى، خو د زندانۍ زړه ودانۍ کې ستونزې ډېرې وې.
د هغه په وينا، ډېرى مهال د باران پر مهال د زندان خونې څڅېدلې او بنديانو ته يې ستونزې جوړولې.
نوموړى وايي، که چېرې بنديان نوې ودانۍ ته ولېږدول شي، نو له ډېرو ستونزو به خلاص شي.
د يادونې ده، اوسمهال د کاپيسا په زندان کې ۳۱۳ زندانيان شته دي چې ۱۷ تنه يې مېرمنې دي .
login or register a new account.
