پکتيکا کې په لومړي ځل د ماشومانو لپاره سيمه ييز ټولګي جوړيږي

ښرنه (پژواک،١١چنګاښ٩٦): په پکتيکا کې د لومړي ځل لپاره د يونسکو له لوري د دوه زرو ماشومانو لپاره سيمه ييز ټولګي جوړيږي.

د پکتيکا د پوهنې رياست سرپرست محمد نسيم واجد د چنګاښ په ١١مه پژواک خبري اژانس ته وويل چې يونسکو موسسې د لومړي ځل لپاره په دې ولايت کې خپل فعاليتونه پيل کړل.

 هغه زياته کړه، يونسکو د لومړي ځل لپاره په پکتيکا کې ۵۰ سيمه ييز ټولګي جوړوي چې دوه زره هلکانو او نجونو ته به په کې د ښځينه ښوونکو له خوا په خپلو سيمو کې زده کړې ورکول کېږي.

د ده په وينا، دې زده کوونکو ته کتابونه، قرطاسيه او ټول اړوند درسي توکي رسېدلي دي او په راتلونکو څو ورځو کې به يې درسونه پيل شي.

دى وايي: ((دغه صنفونه موږ په هغو سيمو کې جوړوو چې هلته مکتبونه نه وي او خلک په دې برخه کې له مشکل سره مخامخ دي.))

د ځوانانو په پارلمان کې د پکتيکا استازي عبدالحق فقيرزاده په دې اړه وويل، د دې ولايت په ډېرو سيمو کې ماشومان او په ځانګړي ډول نجونې ښوونځيو ته لاسرسى نه لري، خو د دې پروګرام په پيلېدو سره به دغه ستونزه حل شي.

يونسکو د ملګرو ملتونو په چوکاټ کې په تاريخي، فرهنګي او علمي برخو کې کار کوي.

پکتيکا د افغانستان له لرو پرتو او وروسته پاتې ولايتونو څخه دى، چې دا مهال د نورو ستونزو ترڅنګ د نجونو لپاره لېسه هم نه لري.