پکتیکا کې یو ملکي وګړی او پنځه وسله وال وژل شوي

ښرنه (پژواک، ٣٠ چنګاښ ٩٦): د پکتيکا امنيتي مسوولين وايي، د دغه ولایت په ګومل او سروبي ولسواليو کې د ماين په چاودنه او وسله وال بريد کې يو کوچى او پنځه وسله وال وژل شوي دي.

د پکتيکا د سروبي ولسوالۍ امنيه قوماندان لومړي څارن محمد ايوب تندر د چنګاښ په ۳۰مه پژواک خبري اژانس ته وويل چې نن سهار اته بجې د سروبي په بازار کې د کوچيانو پر تراکتور د ماين چاودنه وشوه چې يو کوچى په کې وژل شوى او درې نور ټپیان دي.

ده زياته کړه، کوچيانو غوښتل له بازار سره نږدې سيمې څخه د څښاک او څارويو لپاره اوبه يوسي چې د طالبانو له خوا پر سړک د ځای پر ځای شوي ماين ښکار شول.

له بلې خوا د پکتيکا په ګومل ولسوالۍ کې پنځه وسله وال وژل شوي دي.

د دغه ولايت د ملي امنيت يوې باوري سرچينې پژواک خبري اژانس ته وويل چې د ملي امنيت د (٠٨) قطعې له لوري د وسله والو طالبانو نومول شوي والي ته کمين نيول شوى و چې د بريد په ترڅ کې دغه والى روغ وتلى خو د يوه ځانمرګي په ګډون يې پنځه وسله وال وژل شوي دي.

سرچينه زياتوي، د طالبانو دغه نومول شوى والي پيراغا نومېږي.

طالبانو بيا د يادو دواړو پېښو په اړه څه نه دي ويلي.