تعقيبي-مزارشريف (پژواک، ١٨ لړم ٩٦): د بلخ ولايت په مرکز مزارشريف ښار کې د ځانمرګي بريد له امله پخوانى ولسوال او د جمعيت ګوند قوماندان وژل شوى او دوه تنه نور ټپيان دي.
دغه بريد نن سهار شاوخوا اته بجې د مزارشريف ښار سوېل لور ته د شاديان دروازې په سيمه کې شوى دى.
د بلخ د امنيې قوماندانۍ د امنيت امر سمونوال عبدالرزاق قادري د لړم په ١٨مه پژواک خبري اژانس ته وويل چې په دې پېښه کې د دغه ولايت د مارمول پخوانى ولسوال او د جمعيت ګوند قوماندان حاجي عبدالغني وژل شوى او دوه تنه نور ټپيان دي.
دغه راز د پېښې يوه عيني شاهد منصور پژواک ته وويل چې دغه ځانمرګى بريد د حاجي غني په نوم پر یوه قومي مشر شوى دى.
هغه وايي چې په دې پېښه کې حاجي غني وژل شوى او درې نور ملکي وګړي ټپيان دي.
د دې پېښې مسووليت تر اوسه چا پر غاړه نه دی اخيستى.
login or register a new account.
GET IN TOUCH
NEWSLETTER
SUGGEST A STORY
PAJHWOK MOBILE APP