خوست کې له چاودېدونکو توکو ډک هاموې موټر نيول شوى

خوست ښار (پژواک، ۱۵ کب ۹۶): د خوست پوليسو په نادرشاه کوټ ولسوالۍ کې له چاودېدونکو توک ډک هاموې موټر نيولی او شنډ کړی یې دی.

د خوست د امنيې قوماندانۍ د جنايي جرمونو پر وړاندې د مبارزې مدير سمونوال شېر داود ارين د کب په ١٥مه يوه خبري کنفرانس ته وويل چې د پوليسو ياد هاموې موټر يې د استخباراتي راپورونو پر بنسټ نيولی دی.

نوموړي څه ونه ويل چې د پوليسو دغه موټر له کوم ځایه او څنګه راوستل شوی و، خو زياته يې کړه چې غوښتل يې حکومتي تاسيسات موخه وګرځوي.

شېر داود ارين وويل چې له ياد هاموې موټر سره څوک نه دي نيول شوي، خو په اړه یې څېړنې روانې دي.

د يادونې ده، وسله وال طالبان په دې وروستيو کې له دولتي ځواکونو د نيول شوو رينجر او هاموې پوځي موټرو په وسیله ځانمرګي بريدونه کوي.

وسله والو طالبانو تر اوسه په دې اړه څه نه دي ويلي.

د يوه بل خبر له مخې، د خوست په نادرشاه کوټ ولسوالۍ کې ځايي خلکو ويلي چې څلور پوليس له يوه رينجر موټر سره وسله والو طالبانو ته تسليم شوي، خو شېرداود دغه خبر رد کړ.

په ورته وخت کې د خوست د امنيې قوماندانۍ منسوبينو ۱۵ هغه کسان هم خبريالانو ته وښودل چې د دوی په وينا، د بېلابېلو جنايي جرمونو په تور نيول شوي دي.

د جنايي جرمونو پر وړاندې د مبارزې مدير سمونوال شېرداود ارين خبريالانو ته وويل چې له دغو کسانو سره يې يوه سراچه او يوه مازدا موټر او دوه عرادې موټرسايکل هم نيولي دي.

د يوه بل خبر له مخې، د خوست ښار په يوه هوټل کې د دوو کسانو تر منځ ډزې شوې او له امله يې دوه کسان ټپيان شوي دي.

د خوست د امنيې قوماندانۍ مطبوعاتي دفتر پژواک اژانس ته وويل چې دا پېښه نن غرمه مهال په سپوږمۍ هوټل کې رامنځته شوې ده او له امله يې دوه کسان ټپيان شوي چې اوسمهال تر درملنې لاندې دي.

سرچينه زياته کړه چې پېښه د شخصي دښمنۍ پر بنسټ شوې او په تړاو يې څلور کسان له دوه ميله کلاشينکوفونو سره نيول شوي دي.

login or register a new account.