<p>کابل (پژواک،٣٠ چنګاښ ٩٧) : ولسمشرۍ ماڼۍ وايي چې جنرال دوستم سبا د يکشنبې په ورځ هېواد ته راځي او د ولسمشر د لومړي مرستيال په توګه به خپلې دندې ته ادامه ورکړي.</p>
<p>دوستم شاوخوا يوکال مخکې د ايشچي تر قضيې وروسته د درملنې په موخه ترکيې ته تللى و، همالته ايسار و، بيا هغه هېواد ته د راتګ هڅه وکړه، خو الوتکې ته يې د مزار شريف په هوايي ډګر کې د کېناستو اجازه ورنه کړل شوه.</p>
<p>خو د ولسمشر وياند هارون چخانسوري نن د چنګاښ په ٣٠مه،په کابل کې د يوې خبري غونډې پر مهال وويل چې دوستم هېڅکله تبعيد نه و، بلکې ترکيې ته ددرملنې لپاره تللى و.</p>
<p>ده زياته کړه، هغه اوس تر درملنې وروسته ښه شوى، سبا مازيګر به په يوه خصوصي الوتکه کې له ترکيې څخه کابل ته را ورسېږي.</p>
<p>نوموړي وويل،د کابل په هوايي ډګر کې د هغه د رسمي هرکلي لپاره پروګرام جوړ شوى او هېواد ته تر رسېدو وروسته به خپل دفتر ته ځي او د ولسمشر د لومړي مرستيال په توګه به خپلې دندې ته ادامه ورکړي.</p>
<p>د چخانسوري د دوستم د دوسيې په اړه وويل چې هغه حقوقي موضوع ده، عدلي او قضايي ارګانونو پورې تړاو لري، دغه ارګانونه خپلواکه دي او د افغانستان له نافذه قوانينو سره سم به ورته رسيدګي کېږي.</p>
<p>بلخوا د ولسمشر د لومړي مرستيال ددفتر رييس عنايت بابر فرهمند هم پژواک ته ومنله چې عبدالرشيد دوستم سبا تر غرمې وروسته هېواد ته را ستنېږي.</p>
<p>هغه زياته کړه،د دوستم د راتګ د هرکلي لپاره چمتووالى نيول شوى او دهغه د ساتونکو ځانګړې قطعه هم له جوزجان ولايت څخه کابل ته را رسېدلې ده.</p>
<p>د نوموړي په وينا، د هغې پرېکړې له امله چې د دوستم او د ارګ د استازو ترمنځ شوې، ټاکل شوې چې نظام الدين قيصاري خوشې شي، خو يوه موده به په کابل کې وي.</p>
<p>يوې امنيتي سرچينې پژواک اژانس ته وويل چې قيصاري اوس مهال د ملي امنيت په نظارت خونه کې دى.</p>
<p>خو د ولسمشروياندچخانسوري پژواک اژانس ته وويل چې قيصاري خوشې کېږي نه، هغه تر پلټنو لاندې دى او وروسته به يې قضيه څارنوالۍ ته ولېږل شي.</p>
<p>د يادونې ده چې د قيصاري تر نيول کېدو وروسته د هېواد په يو شمېر شمالي ولايتونو کې پراخه لاريونونه پيل شوي دي.</p>
<p>خو حکومتي سرچينې وايي چې د قيصاري ترڅنګ په فراه او اروزګان کې هم ورته زورواکي او قوماندانان نيول شوي، خو هلته خلکو هېڅ ډول غبرګون ونه ښود.</p>
