پکتیکا کې طالبانو ته لېږدېدونکې ۱۷۹ میله وسلې نیول شوې دي

کابل (پژواک، ٢٤ لړم ٩٧): د ملي امنيت ځواکونو د پکتيکا په سروبي ولسوالۍ کې ١٧٩ ميله وسلې کشف او ترلاسه کړې چې د انتقال په تور یې يو کس هم نيول شوى دى.

دغه څرګندونې په هغې خبرپاڼه کې شوې چې د ملي امنيت له مطبوعاتي دفتره د لړم په ٢٤مه پژواک خبري اژانس ته رالېږل شوې ده.

په خبرپاڼه کې راغلي چې د ملي امنيت ځواکونو دغه وسله د پکتيکا د سروبي ولسوالۍ په سپېدار سيمه کې په يوه موټره کې نیولې ده.

سرچينه وايي: ((له دغو وسلو سره نيول شوى کس عصمت الله نومېږي، دغه وسلې يې له ډيورنډ فرضي کرښې هاخوا په موټر کې د لرګيو لاندې په ماهرانه ډول ځاى پر ځاى کړې وې او غوښتل یې چې په غزني ولايت کې د طالبانو قوماندان بهاول مشهور په ايوبي ته انتقال کړي چې د ملي امنيت ځواکونو له لوري د پکتيکا په سروبي ولسوالۍ کې ونيول شول.))

د خبرپاڼې په حواله، په دغو وسلو کې ١٦٨ ميله تومانچې، اووه ميله کلاشينکوفونه، څلور ميله درازنوف او  څلور زره مرمۍ شاملې دي.

بل لور ته وسله والو طالبانو تر اوسه په دې اړه رسنيو ته څه نه دي ويلي.