<p>غزني ښار (پژواک، ٥ سلواغه ٩٨): د غزني اوسېدونکي او د ولايتي شورا غړي وايي چې د روان مالي کال په بودجه کې د دغه ولايت له ١٨ څخه يواځې د پنځو ولسواليو لپاره پراختيايي بودجه په نظر کې نيول شوې چې له امله يې دوى اندېښمن دي.</p>
<p>دوى زياتوي چې د دغه ولايت يو شمېر ولسواليو ډېرې سيمې امن دي خو دوه ګونی چلند ورسره شوى او هېڅ ډول پروژه ورته په نظر کې نه ده نيول شوې.</p>
<p>په دې اړه د غزني ښار اوسېدونکي عبدالمجيد ژړاند د سلواغې په پنځمه پژواک خبري اژانس ته وويل چې د روان مالي کال په بودجه کې د دغه ولايت د هغو ولسواليو لپاره پروژې په نظر کې نيول شوې چې په ولسي جرګه کې استازي لري.</p>
<p>هغه وايي: ((لس کاله کېږي چې د ناهور، مالستان او جاغوري وکيلان په ولسي جرګه کې ناست دي، همدې ولسواليو لپاره ډېرې پروژې په پام کې نيول شوې دي.))</p>
<p>نوموړي نيوکه وکړه چې په تېرو څه باندې لسو کلونو کې د غزني ١٤ پښتون مېشتو ولسواليو ته هېڅ کار نه دى شوى.</p>
<p>دغه راز مدني فعال محمد عيان هم وايي چې په سږنۍ بودجه کې يواځې د پنځو ولسواليو لپاره پراختيايي<a href="/wp-content/uploads/old/غزني بوديجه.jpg"><strong> بودجه</strong></a> په نظر کې نيول شوې ده.</p>
<p>ده وويل: ((له کومې ورځې چې د غزني پښتانه په ولسي جرګه کې استازي نه لري، کار هم ورته نه دى شوى، په هر څه کې يواځې درې ولسوالۍ په پام کې نيول کېږي.))</p>
<p>همدارنګه د غزني ولايتي شورا غړي عبدالجامع جامع وايي چې ولايتي شورا د غزني لپاره ٤٠ پروژې د ماليې وزارت ته وړانديز کړې وې.</p>
<p>خو دى وايي: ((اوس يواځې د څلورو لپاره بودجه منظوره شوې او څلور نور يې ويلي چې د هند هېواد له مرستو څخه به جوړېږي.))</p>
<p>جامع هم نيوکه وکړه چې د غزني لپاره سږ کال منصفانه بودجه په نظر کې نه ده نيول شوې، بايد غور پرې وشي.</p>
<p>د يادو څرګندونو په اړه د غزني والي وحيدالله کليمزي پژواک ته وويل، دغه موضوع به حقيقت ونه لري چې يواځې دې د دغه ولايت د پنځو ولسواليو لپاره بودجه په نظر کې نيول شوې وي.</p>
<p>هغه وايي: ((موږ په دې اړه پلټنې پيل کړې، که چېرې دغه موضوع حقيقت ولري زه خپله ورپسې کابل ته ځم او پارلمان ته ورځم.))</p>
<p>د يادونې ده، ولسي جرګې د تېرې اوونې د چهارشنبې په ورځ د ١٣٩٩ مالي کال بودجه د رايو په اکثريت سره تصويب کړه.</p>
<p>له دغه تصويب وروسته په ټولنيزو رسنيو کې يو لېست خپور شو چې له مخې يې د غزني د مرکز لپاره پنځه پروژې، د جاغوري ولسوالۍ لپاره ١٤ پروژې، د قره باغ لپاره پنځه پروژې، د مالستان لپاره شپږ پروژې او د اندړ او ناهور ولسواليو لپاره يوه يوه پروژه په نظر کې نيول شوې ده.</p>
