مصري کمپنۍ په افغانستان کې هم د زېربنا او انرژۍ سکټور برخو کې پانګونه کوي

کابل (پژواک، ۱۲ لړم ۹۹): ولسمشرۍ ماڼۍ وايي، د حسن علم هولډنګ مصري کمپنۍ په بېلابېلو هېوادونو کې پنځه میلیارد ډالر پانګونې ترڅنګ په افغانستان کې هم د زېربنا او انرژۍ سکټور په برخو کې پانګونې ته لېوالتیا لري.

له ولسمشرۍ ماڼۍ پژواک خبري اژانس ته په رالېږلې خبرپاڼه کې راغلي چې ولسمشر محمد اشرف غني نن له غرمې مخکې د حسن علم هولډنګ مصري کمپنۍ له مسوولینو سره په کتنه کې چې په کابل کې د مصر سفیر هم حضور درلود، په افغانستان کې د پانګونې پر فرصتونو خبرې وکړې.

د یادې خبرپاڼه له مخې، ولسمشر غني په دې کتنه کې وویل چې افغانستان په بېلابېلو برخو کې د بهرنیو پانګونو لپاره ګڼ فرصتونه لري او له دغو فرصتونو د استفادې په موخه د بهرنیو پانګه والو کمپنیو ته دروازې پرانيستې دي.

د دې خبرپاڼه پر بنسټ، د حسن علم کمپنۍ مسوولینو په بېلابېلو هېوادونو کې پنځه میلیارد ډالر پانګونې ته په اشارې په افغانستان کې هم د زیربنا او انرژۍ سکتور کې پانګونې ته لېوالتیا وښوده.

خبرپاڼه کاږي چې په کابل کې د مصر سفیر او د یادې کمپنۍ مسوولینو په افغانستان کې د پانګونې فرصتونو ته په اشارې وویل، د اوږدمهاله برنامو او مشارکت له لارې به د کانونو، انرژۍ او زېربنا برخو کې خپلې نړیوالې تجربې له افغانانو سره شریکې کړي او ګډ کار به وکړي.