<p>کابل(پژواک، ۱۴ لړم ۹۹): د کورنیو چارو وزارت وایي، چې د کابل پوهنتون برید په تړاو د بې غورۍ له امله د درېیمې حوزې امرپه ګډون ۱۳ امنیتي مسوولین نیول شوي او څارنوالۍ ته معرفي شوي دي.</p>
<p>د یادونې ده چې دوه ورځې مخکې د لړم میاشتې په ۱۲ مه درېیو وسله والو کسانو پر کابل پوهنتون ډله ییز برید کړ، چې د کورنیو چارو وزارت د معلوماتو له مخې، په دغه برید کې لږ تر لږه ۲۲ تنه وژل شوي او ۲۲ نورټپيان دي.</p>
<p>د کورنیو چارو وزارت وياند طارق ارین نن په خپله فیسبوک پاڼه کې لیکلي چې د کابل پوهنتون برید په تړاو د بې غورۍ له امله د ښار د درېیمې حوزې امر، جنايي مدیر، د پوهنتون د ټولي قوماندان په ګډون ۱۳ امنیتي مسوولین نیول شوي او څارنوالۍ ته معرفي شوي دي.</p>
<p>د يادونې ده، چې تر دې مخکې د کورنيو چارو وزارت سرپرست وزير مسعود اندرابي ويلي و، په کومه حوزه کې چې امنيتي پېښه رامنځته شي، امر يې له دندې لرې کېږي.</p>
<p>وسله والو طالبانو په دې برید کې لاس لرل رد کړي او دغه برید د ولسمشر محمد اشرف او نورو چارواکو له خوا په سختو ټکو غندل شوی دى.</p>
