<p style="text-align: justify;">کابل (پژواک، ٤ کب ٩٩): د ولسمشر مرستيال امرالله صالح وايي چې د کابل ښار په پرونۍ چاودنه کې څلور کسان وژل شوي او پنځه نور ټپیان دي.</p>
<p style="text-align: justify;">دغه چاودنه پرون مازديګر شاوخوا څلور نيمې بجې د کابل ښار څلورمې امنيتي حوزې اړوند د بره کي څلورلارې ته څېرمه د پوليسو پر يوه رينجر موټر وشوه.</p>
<p style="text-align: justify;">د کابل پوليسو وياند فردوس فرامرز پرون ويلي وو چې په دې چاودنه کې دوه کسان وژل شوي او پنځه نور ټپیان دي.</p>
<p style="text-align: justify;">خو د ولسمشر لومړى مرستيال امرالله صالح نن د سهار شپږ نيمو بجو امنيتي ناستې په راپور کې ويلي چې په دې چاودنه کې څلور کسان وژل شوي دي.</p>
<p style="text-align: justify;">هغه زياته کړې چې په وژل شوو کې يو اووه کلن اسپندي ماشوم هم و چې هلته يې پر سړک مزدوري کوله.</p>
<p style="text-align: justify;">بلخوا ځينو رسنيو خبر ورکړى و چې په وژل شوو کې د کورنيو چارو وزارت د مالي او اداري معينيت يو افسر سمونوال سيد ابرار سادات هم شامل دى خو رسمي سرچينو یې په اړه څه نه دي ويلي.</p>
<p style="text-align: justify;">د يو بل خبر له مخې، د ملي امنيت سلاکار ډاکتر حمدالله محب تېره شپه د کابل په وزير اکبر خان او صحت طفل روغتونونو کې د يادې پېښې د ټپيانو پوښتنه کړې ده.</p>
<p style="text-align: justify;">هغه ويلي، د سولې او ثبات دښمنان د پردیو استخباراتو په لمسون د ټولنې ټول قشرونه هغه که ملکيان دي او که دولتي کارمندان او امنیتي سرتېري، په نښه کوي او ترهګريز فعالیتونه کوي.</p>
<p style="text-align: justify;">هغه زياته کړې د افغانانو دښمنان باید وپوهېږي چې په دغو غیر اسلامي او ناانساني بریدونو خپلو شومو موخو ته نه شي رسېدای؛ ځکه امنیتي او دفاعي سرتېري د خاورې او خلکو په دفاع کې د خپلو وینو له تویېدو درېغ نه کوي.</p>
<p style="text-align: justify;">د ملي امنیت سلاکار وویل، د دې پېښې ټپیان باید د بشپړې درملنې لپاره شاه امان الله خان (ملي امنیت) روغتون ته ولېږدول شي.</p>
<p style="text-align: justify;">وسله والو طالبانو په دې پېښه کې لاس لرل رد کړي دي.</p>
